ایشیاکپ کی ٹکٹوں کیلیے انتظار طول پکڑنے لگا

 کراچی: ایشیاکپ کی ٹکٹوں کیلیے انتظار طول پکڑنے لگا جب کہ ایشین کرکٹ کونسل کی جانب سے کوئی اپ ڈیٹ تاحال سامنے نہیں آئی۔

ایشیاکپ کے انعقاد میں ایک ماہ سے بھی کم وقت باقی ہے مگر ایشین کرکٹ کونسل کی جانب سے ٹکٹوں کے حوالے سے کوئی اپ ڈیٹ جاری نہیں کی گئی، ایشیائی شوپیس ایونٹ کا آغاز 30 اگست کو پاکستان میں ہوگا۔

اس ٹورنامنٹ کے کچھ میچز پاکستانی میدانوں جبکہ زیادہ تر مقابلے سری لنکا میں ہوں گے، پاکستان اور بھارت کے درمیان 2 ستمبر کو کینڈی میں مقابلہ ہوگا جہاں پر تماشائیوں کی گنجائش 35 ہزار ہے، اس میں ہاؤس فل رہنے کی توقع ہے تاہم ٹکٹوں کے اجرا میں تاخیر سے شائقین کی فرسٹریشن میں اضافہ ہونے لگا،انھیں ٹکٹ ملنے پر اپنا سفری پلان فائنل کرنا ہے۔

یہ بھی پڑھیں: ’’ایشیاکپ شیڈول کے اعلان پر پاکستان نے بڑے پن کا مظاہرہ کیا‘‘

ایک رپورٹ کے مطابق اے سی سی کی جانب سے ٹکٹوں کے اجرا کا عمل تیز کیا جارہا ہے، 10 اگست تک اس حوالے سے تفصیلات ظاہر کردی جائیں گی، ایشیا کپ میں پاک بھارت معرکے کیلیے دونوں ممالک کے شائقین کی بڑی تعداد میں سری لنکا جانے کا امکان ہے۔

ٹکٹ پریمیئم، اسٹینڈرڈ اور جنرل کیٹیگری میں فروخت کیلیے پیش کیے جائیں گے، پاکستان اور بھارت کے میچ میں ٹکٹوں کی قیمت زیادہ ہوگی۔ سری لنکا کی جانب سے پہلے ہی غیرملکی شائقین کو ٹکٹ ڈالرز میں فروخت کرنے کا اعلان کیا جاچکا ہے، ٹکٹیں آن لائن بھی فروخت کیلیے پیش کی جائیں گی۔

یاد رہے کہ ایشیا کپ میں پاکستان اور بھارت کے کم سے کم 2 بار مدمقابل آنے کا امکان ہے، اگر دونوں ٹیمیں فائنل کیلیے کوالیفائی کرتی ہیں تو پھر تیسری بار بھی مقابلہ ہوگا۔ اکتوبر میں بھارت میں شیڈول ورلڈ کپ کی تیاری کیلیے اس بار ایشیائی شوپیس ایونٹ ون ڈے فارمیٹ میں کھیلا جائے گا۔ شائقین اسٹارز کو ایکشن میں دیکھنے کیلیے بے چین ہیں۔