نامعلوم افراد نے نایاب انڈس ڈولفن کو گولیاں مار کر ہلاک کردیا

  کراچی: بلوچستان کی حدود  میں نامعلوم مسلح افراد  نے نایاب بلائنڈ انڈس ڈولفن کو گولیاں مار کر ہلاک کردیا۔

کنزرویٹر سندھ وائلڈ لائف جاوید مہر کے مطابق  راستہ بھٹک کر دریائے سندھ سے  بلوچستان میں داخل ہونے والی اندھی ڈولفن کو گولیاں مارنے کا افسوسناک واقعہ پیش آیا ہے۔

سندھ وائلڈ لائف ریسکیو ٹیم کو محکمہ انہار کے عملے کی جانب سےد ریائے سندھ میں پائی جانے والی نایاب انڈس ڈولفن کی موجودگی کی اطلاع دی گئی، ریسکیو ٹیم وہاں پہنچی تو انڈس ڈولفن کے جسم پر گولیاں لگنے سے دو سراخ بنے ہوئے تھے اور وہ مرچکی تھی۔

جاوید مہر کے مطابق بلائنڈ ڈولفن  دریائے سندھ سے  راستہ بھٹک کر کیرتھر کینال کے ذریعے گینگ ریگولیٹر سے بلوچستان کی حدود میں داخل  ہوگئی تھی جسے نامعلوم مسلح افراد نے گولیاں مار کر ہلاک کردیا۔ واضح رہے کہ گینگ ریگولیٹرز   سکھر بیراج سے نکلنے والی کیرتھر کینال سے پانی بلوچستان کی حدود میں لے جاتا ہے۔

ماری جانے والی انڈس ڈولفن کی عمر تقریباً 16 سے 20 ماہ کے درمیان تھی۔ حکام کے مطابق وہ بلوچستان وائلڈ لائف ڈپارٹمنٹ سے رابطے میں ہیں اور وقوعے کی تفتیش کی جارہی ہے۔