انسداد دہشتگردی عدالت؛ عمران خان کی حاضری معافی کی درخواست پر فیصلہ محفوظ

 لاہور: انسداد دہشت گردی عدالت نے عمران خان کی عبوری ضمانتوں میں دائر حاضری معافی کی درخواست پر فیصلہ محفوظ کرلیا۔

9 مئی کو جناح ہاؤس جلاؤ گھیراؤ  سمیت دیگر مقدمات میں انسداد دہشت گردی عدالت میں چیئرمین پی ٹی آئی عمران خان کے وکیل نے ایک روزہ حاضری معافی کی درخواست کی، جس پر عدالت نے فیصلہ محفوظ کرلیا۔

عدالت میں دائر درخواست میں مؤقف اختیار کیا گیا تھا کہ چیئرمین پی ٹی آئی کو گرفتار کرلیا گیا ہے۔ ان کی اپیل آج دائر کررہے ہیں۔ وکیل بیرسٹر سلمان صفدر نے کہا کہ اُمید ہے چیئرمین پی ٹی آئی کی سزا ایک ہفتے تک معطل ہو جائے گی اور وہ جلد اپنی آزادی کو انجوائے کریں گے۔ چیئرمین پی ٹی آئی باقاعدگی کے ساتھ عدالت میں پیش ہوتے رہے ہیں ۔

فاضل جج نے دوران سماعت ریمارکس دیے کہ آپ اپیل کے سماعت کے لیے مقرر ہونے اور سزا معطل ہونے پر اتنا پُرامید کیوں ہیں؟۔

وکیل برہان معظم ایڈووکیٹ نے کہا کہ چیئرمین پی ٹی آئی آپ کی عدالت میں پیش ہونا چاہتے ہیں، حالات و واقعات ایسے ہیں وہ پیش نہیں ہوسکتے۔ آپ درخواست گزار کے پروٹیکشن آرڈر جاری کریں۔

فاضل جج نے استفسار کیا کہ اس پر سرکار کیا کہتی ہے؟، جس پر اسپیشل پراسیکیوٹر فرہاد علی شاہ نے کہا کہ اس پر قانون بڑا کلیئر ہے۔ آپ ان کی ضمانتیں مسترد کریں۔