سندھ اسمبلی 11 اگست کو تحلیل کی جائے گی، ایڈوائس تیار

  کراچی: مشیر قانون مرتضیٰ وہاب نے کہا ہے کہ سندھ اسمبلی گیارہ اگست کو تحلیل کردی جائے گی، جس کا مسودہ تیار کرلیا گیا ہے۔

مشیر قانون مرتضیٰ ویاب نے میڈیا سے گفتگو کرتے ہوئے تصدیق کی کہ محکمہ قانون نے سندھ اسمبلی تحلیل کرنے کی سمری کا ڈرافٹ تیار کرلیا، جو وزیراعلیٰ کو آئینی طریقہ کار کے تحت ارسال کیا جائے گا۔

انہوں نے بتایا کہ سندھ اسمبلی کی آئینی مدت 13 اگست کو مکمل ہوگی جبکہ اسمبلی کو دو روز قبل یعنی گیارہ اگست کو تحلیل کرنے کا فیصلہ کیا گیا ہے۔

مشیر قانون نے بتایا کہ وزیراعلیٰ سندھ کل گورنر سندھ کو اسمبلی تحلیل کرنے کی ایڈوائس ارسال کریں گے۔

دوسری جانب جی ڈی اے اور ایم کیو ایم نے سندھ سے پیپلزپارٹی کی حکومت کے خاتمے پر کل یوم نجات منانے کا اعلان کیا ہے۔

اسمبلی اجلاس میں جی ڈی اے اور ایم کیو ایم پاکستان کے رہنماؤں نے اظہار خیال کرتے ہوئے کہا کہ سندھ میں نگران وزیراعلی پیپلزپارٹی کا نامزدہ کردہ نہیں ہوگا،سندھ حکومت خاتمے پر یوم نجات منائیں گے،  ظالم  اور نوکریاں فروخت کرنے والی حکومت کا خاتمہ ہوا۔

دونوں پارٹیوں کے رہنماؤں نے دعویٰ کیا کہ جی ڈی اے اور ایم کیوایم پاکستان میں نگر ان وزیراعلی کے نام پراتفاق ہوگیا۔ اراکین اسمبلی نے کہا کہ پیپلزپارٹی کے مزے ختم، سندھ میں پندرہ سالہ سیاہ دور کا خاتمہ ہونے کو ہے، عوام آج یوم نجات منائیں، سندھ میں آئندہ حکومت جی ڈی اے، ایم کیوایم پاکستان اپنے دیگر اتحادیوں کے ساتھ ملکر بنائیں گے۔