امید ہے نگراں وزیراعظم شفاف انتخابات کو یقینی بنائیں گے، شہباز شریف

 اسلام آباد: وزیراعظم شہباز شریف نے کہا ہے کہ انوارالحق کاکڑ ایک پڑھے لکھے اور محب وطن شخص ہیں، امید ہے کہ وہ ملک میں شفاف، آزادانہ اور غیر جانب دارانہ انتخابات کے انعقاد کو یقینی بنائیں گے۔

سرکاری اعلامیے کے مطابق وزیراعظم شہباز شریف نے سینیٹر انوار الحق کاکڑ کو نگران وزیراعظم بننے پر مبارک پیش کرتے ہوئے کہا ہے کہ بلوچستان سے نگران وزیراعظم کا انتخاب خوش آئند ہے، آئینی طریقہ کار پر چلتے ہوئے ایک اچھے نام پر اتفاق ہوا، اپوزیشن لیڈر راجہ ریاض کا شکریہ ادا کرتا ہوں جنہوں نے مشاورت میں مدد کی۔

یہ پڑھیں : انوار الحق کاکڑ نگراں وزیراعظم مقرر، صدر مملکت نے سمری منظور کرلی

شہباز شریف ںے کہا کہ انوارالحق کاکڑ ایک پڑھے لکھے اور محب وطن شخص ہیں، تمام جماعتوں کی طرف انوارالحق کاکڑ کے نام پر اعتماد ہمارے درست انتخاب کی علامت ہے، امید ہے کہ وہ ملک میں شفاف، آزادانہ اور غیر جانب دارانہ انتخابات کے انعقاد کو یقینی بنائیں گے۔

یہ بھی پڑھیں : اعتماد کرنے والوں کا شکر گزار ہوں، رب نے قوم کی خدمت کا موقع دیا، نگراں وزیراعظم

وزیراعظم نے کہا کہ 16 ماہ میں ہم نے دن رات محنت کرکے ملک کو جس معاشی استحکام سے ہم کنار کیا ہے، امید ہے اس کا تسلسل جاری رہے گا، ترقی، تعمیر اور معاشی بہتری کا تسلسل یقینی بنانا پاکستان اور عوام کی بہتری کے لئے ضروری ہے، دعا گو ہوں کہ نگران وزیراعظم اور ان کی کابینہ عوام اور آئین کی توقعات پر پورا اتریں۔