گڈاپ سٹی؛ تالاب میں نہاتے ہوئے 2 سگے بھائیوں سمیت 3 نوجوان ڈوب کر جاں بحق

کراچی: گڈاپ سٹی سپر ہائی وے کے قریب تالاب میں نہاتے ہوئے 2 سگے بھائیوں سمیت 3 نوجوان ڈوب کر جاں بحق ہوگئے۔ 

ریسکیو حکام کے مطابق متوفین کی شناخت 17 سالہ وقاص اس کے چھوٹے بھائی 16 سالہ یوسف ولد قاسم عمر اور 24 سالہ شان ولد اللہ بخش کے نام سے کی گئی۔ ایس ایچ او گڈاپ سٹی ندیم صدیقی نے بتایا کہ متوفین بفرزون کے رہائشی تھے جو موٹر سائیکلوں پر 6 دوستوں کے ہمراہ آئے تھے اور وہ گڑھے میں جمع بارش کے پانی میں نہا رہے تھے جس کی گہرائی کا انہیں اندازہ نہ ہو سکا جس کے باعث وہ ڈوب گئے۔

پولیس کے مطابق متوفین کے ہمراہ آنے والے دوست فیصل نے مدد گار 15 پر کال کر کے واقعہ کی اطلاع دی جس پر پولیس موقع پر پہنچ گئی، واقعہ کی اطلاع متوفین کے اہلخانہ کو ملی تو کہرام مچ گیا جبکہ اہل محلہ اور رشتے داروں کی بڑی تعداد ان کی رہائش گاہ جمع ہوگئی۔