بشریٰ بی بی توشہ خانہ کیس کی جے آئی ٹی کے سامنے پیش

 اسلام آباد: چیئرمین پی ٹی آئی عمران خان کی اہلیہ بشریٰ بی بی نے اٹک جیل میں شوہر سے دو گھنٹے طویل ملاقات کی جس کے بعد وہ اسلام آباد آکر توشہ خانہ کیس کی تفتیش کرنے والی جے آئی ٹی کے سامنے پیش ہوگئیں۔

ایکسپریس نیوز کے مطابق عمران خان کی اہلیہ بشریٰ بی بی ان سے ملنے اٹک جیل پہنچیں اور عمران خان سے ملاقات کی جو کہ دو گھنٹے تک جاری رہی۔

ملاقات کے بعد وہ اٹک جیل سے ڈی آئی جی آفس اپنی قانونی ٹیم کے ساتھ اسلام آباد پہنچیں جہاں توشہ خانہ کیس کی تفتیش کرنے والی جے آئی ٹی کے سامنے پیش ہوئیں۔

انہیں سیشن عدالت نے آج ڈی آئی جی آفس میں شامل تفتیش ہونے کی ہدایت کی تھی جس پر بشریٰ بی بی توشہ خانہ کیس میں دکان کی جعلی رسید بنانے کے تھانہ کوہسار میں درج مقدمہ میں اپنا بیان ریکارڈ کرایا۔ جے آئی ٹی نے مقدمہ 422/23  میں بشریٰ بی بی سے تحقیقات کے لیے سوالات کیے۔

بشریٰ بی بی اپنی لیگل ٹیم کے ہمراہ تقریباً پچاس منٹ تک جے آئی ٹی کے سامنے شامل تفتیش رہیں جس کے بعد وہ واپس روانہ ہوگئیں، جے آئی ٹی نے بشریٰ بی بی سے 20 کے قریب سوالات کئے۔

پی ٹی آئی لیگل ٹیم کی قراۃ العین عائشہ نے میڈیا سے گفتگو میں بتایا کہ جے آئی ٹی ٹیم نے بشریٰ بی بی سے گھڑی کی خریداری کے حوالے سے سوالات کیے۔

قراۃ العین عائشہ کے مطابق بشریٰ بی بی نے کہا نہ میں نے کبھی گھڑی خریدی نہ بیچی اور نہ ہی حصہ دار رہی ہوں۔ بشریٰ بی بی نہ کہا میں تو کسی سے ملتی ملاتی بھی نہیں ہوں۔ میرے خاوند پر اس مقدمے سمیت تمام مقدمات اور الزامات جھوٹے ہیں۔

قراۃ العین نے بتایا کہ بشریٰ بی بی نے جے آئی ٹی کی جانب سے پوچھے گئے تمام سوالات کے تسلی بخش جوابات دیے۔ جے آئی ٹی بالکل مطمئن تھی اور دوبارہ پیش ہونے کا کچھ نہیں کہا گیا۔