لیاقت آباد پل پر شہری سے دن دیہاڑے لوٹ مار کی ویڈیو سامنے آگئی

  کراچی: لیاقت آباد پل پر شہری کے ساتھ دن دیہاڑے ڈکیتی کی واردات کی ویڈیو سوشل میڈیا پر وائرل ہوگئی۔

شہر میں لوٹ مار کی وارداتوں کا سلسلہ تھمنے کا نام ہی نہیں لے رہا، ڈاکو جب اور جہاں چاہیں اپنے ہدف کو نشانہ بنا رہے ہیں۔

لیاقت آباد پل پر موٹرسائیکل سوار ڈاکوؤں نے شہری کو دن دیہاڑے نقدی اور موبائل فون سے محروم کردیا جس کی ویڈیو سوشل میڈیا پر وائرل ہوئی ہے۔

واردات کی ویڈیو قریبی عمارت کی گیلری میں موجود شہری نے موبائل فون سے بنائی ہے جس میں ملزمان کو بلا خوف و خطر لوٹ مار کرتے دیکھا جاسکتا ہے۔

ملزمان فرار ہوتے وقت شہری کی موٹرسائیکل کی چابی بھی لے گئے۔

پولیس کا کہنا ہے کہ کسی بھی شہر ی نے واردات کے حوالے سے رپورٹ درج نہیں کرائی تاہم وائرل ہونے والی ویڈیو کی مدد سے ملزمان کی شناخت کی کوششیں شروع کردی گئی ہیں۔