بھارتی ارب پتی کا فضاؤں میں بیٹی کی شادی کا منصوبہ

 دبئی: بھارت کی ارب پتی پوپلے فیملی فضاؤں میں شادی کی تیاریوں میں مصروف ہے جو عیش و عشرت کی نئی تاریخ رقم کرے گی۔

پوپلے فیملی کی یہ تقریب 24 نومبر کو دبئی میں ہوگی جس کیلئے بوئنگ 747 کو خصوصی طور پر تیار کیا گیا ہے۔ تقریب میں بالی ووڈ اور ہالی وڈ کی مشہور شخصیات، معززین، دوست اور فیملی کے افراد سمیت 1000 سے زائد مہمانوں کو مدعو کیا گیا ہے۔

مہمانوں کو لیکر بوئنگ 747 طیارہ دبئی سے ٹیک آف کرے گا اور 3 گھنٹے تک سفر کے لیے عمان جائے گا۔ شادی سکھ روایات اور رسومات کے مطابق انجام دی جائے گی۔

دلہن ودھی کے والد دلیپ پوپلے کا کہنا ہے کہ میں اپنی بیٹی کی شادی کو 2023 کی سب سے مشہور شادی بنانا چاہتا ہوں۔ آسمان میں دولہا اور دلہن سکھ رسومات کے مطابق شادی کی رسومات ادا کریں گے, چونکہ آگ کے ساتھ کچھ رسومات طیارے میں نہیں کی جا سکتیں، اس لیے وہ شادی کے دن بعد میں ہوٹل میں ادا کی جائیں گی۔

دلیپ پوپلے نے مزید کہا کہ اس نے خلا میں اپنی بیٹی یا بیٹے کی شادی کا اہتمام کرنے کا خواب بھی دیکھا تھا لیکن وہ ٹیکنالوجی کا انتظار کریں گے کہ وہ ایسا ہونے دے۔

انہوں نے کہا کہ اس عظیم الشان شادی کو گنیز ورلڈ ریکارڈ میں داخلے کے طور پر بھیجا جائے گا کیونکہ یہ اس خطے میں آسمان پر ہونے والی اپنی نوعیت کی پہلی شادی ہے۔ واضح رہے کہ پوپلے خاندان متحدہ عرب امارات اور بھارت میں زیورات اور ہیروں کی دکانوں کا مالک ہے۔

متحدہ عرب امارات اس سے پہلے بھی بھارت کی دولت مند شخصیات کی پر تعیش شادیوں کی میزبانی کرتا رہا ہے جس میں بزنس مین، بالی ووڈ کے سپر اسٹارز، سیاست دان اور بیوروکریٹس شریک ہوتے ہیں۔ یہ شادیاں عام طور پر ایک ہفتے کی تقریبات پر مشتمل ہوتی ہیں جس میں مختلف ممالک سے سیکڑوں مہمانوں کو مدعو کیا جاتا ہے۔