اسلام آباد؛ رانگ سائیڈ سے روکنے پر نوجوان اور ٹریفک پولیس میں جھگڑا

 اسلام آباد: وفاقی دارالحکومت میں تھانہ کوہسار کی حدود میں رانگ سائیڈ سے روکنے پر نوجوان اور ٹریفک پولیس میں جھگڑا جس کی ویڈیو وائرل ہوگئی۔

ٹریفک پولیس اہلکاروں اور شہری کے درمیان تلخ کلامی ہوئی جس کے بعد شہری کو ٹریفک اہلکاروں نے تشدد کا نشانہ بنایا، شہری کو گریبان سے گھسیٹتے ہوئے پولیس گاڑی میں بٹھایا گیا۔

شہری کے ساتھ موجود خاتون پولیس اہلکاروں سے معافیاں مانگتی رہی لیکن ٹریفک پولیس نے ایک نہ سنی۔ ٹریفک اہلکاروں نے متعلقہ تھانے کی پولیس بلا کر شہری کو گرفتار کروا دیا۔

اسلام آباد ٹریفک پولیس اہلکار وردی پھاڑنے کے جرم میں ایک شہری کو گھسیٹ کر گاڑی میں ڈال کر لے گئے@_honyA_Pti @Q_804_B_3 @MaidahMuhammad @OfficialShehr @amalqa_ @zehrazaidi00 pic.twitter.com/63FqhjfFO9

— عام پاکستانی 804 (@Abbasi3343) September 21, 2023

ویڈیو بناتے شخص سے گفتگو کرتے ہوئے اہلکار نے بتایا کہ گرفتار نوجوان نے ہماری وردی پھاڑی اس لیے اس کو گرفتار کروایا ہے، نوجوان نے چالان کے بعد پولیس اہلکار کی وردی پھاڑ دی جس پر جھگڑا ہوا۔

ٹریفک پولیس حکام کا کہنا ہے کہ ڈی ایس پی لیول کا افسر معاملے کی انکوائری کر رہا ہے، گرفتار کیا گیا نوجوان رانگ سائڈ سے آرہا تھا، اسے ٹریفک اہلکار نے روکا تو پہلے اس نے بدتمیزی کی پھر اہلکار کی وردی پھاڑی۔

پولیس کے مطابق ملزم کو متعلقہ تھانہ کے حوالے کر دیا ہے جہاں اس پر مقدمہ ہوگا۔