یوکرین کا روسی نیوی ہیڈ کوارٹر پر میزائل حملہ، افسران کی ہلاکت کا دعویٰ

کیف: یوکرین نے دعویٰ کیا ہے کہ کریمیا میں روس کے نیوی ہیڈ کوارٹر پر میزائل حملہ کیا گیا ہے جس کے نتیجے میں اعلیٰ فوجی افسران سمیت درجنوں فوجی اہکار ہلاک ہوئے ہیں۔

عالمی میڈیا رپورٹس کے مطابق یوکرین نے کریمیا میں روسی نیوی ہیڈکوارٹر پر حملے کے نتیجے میں درجنوں فوجی اہلکار مع اعلی فوجی افسران کی ہلاکتوں کا دعویٰ کیا ہے۔

دوسری جانب روسی وزارت دفاع نے حملے کے حوالے سے ابتدائی طور پر کہا تھا کہ ایک فوجی مارا گیا ہے تاہم بعد میں جاری کردہ بیان میں کہا گیا کہ اہلکار حملے کے بعد لاپتہ ہے۔ حملہ کریمیا کی بندرگاہ کے قریب شہر سیواستوپول میں ہوا۔

واضح رہے کہ جزیرہ نما کریمیا کو روس نے 2014 میں اپنے ساتھ الحاق کیا تھا۔ روس کی جانب سے یوکرین پر حملے کے بعد سے کریمیا اکثر یوکرین حملے کا نشانہ بنتا رہتا ہے۔

مزید برآں کریمیا یوکرین پر حملے میں مرکز کے طور پر کلیدی کردار ادا کرتے آیا ہے۔ 19ویں صدی سے روس کے بحیرہ اسود کے بحری بیڑے کا مرکزی اڈہ سیواستوپول، یوکرین پر حملے میں بحری کارروائیوں کے لیے ایک خاص اہمیت رکھتا ہے۔