بلاک بسٹر فلم ’جوان‘ کے ڈائریکٹر نے ہالی وڈ کی آفر کیوں مسترد کی؟

 ممبئی: بالی وڈ کی میگا تھرلر بلاک بسٹر فلم ’جوان‘ کے ڈائریکٹر ایٹلی نے دعویٰ کیا ہے کہ فلم کی شاندار کامیابی کے بعد انہیں ہالی وڈ کی طرف سے فلموں کی آفر ملی ہے۔ 

بھارتی میڈیا سے تازہ گفتگو میں فلمساز نے بتایا کہ اگرچہ وہ آفرز بہت زیادہ منافع بخش تھیں لیکن انہوں نے اسے مسترد کردیا۔

ایٹلی کا کہنا تھا کہ ان کے خیال میں فلم بنانے کا عمل محبت اور شوق سے ہونا چاہئے اور صرف پیسے کیلئے یہ کام اچھا نہیں ہوسکتا۔

فلمسازی کے متعلق اپنے نظریہ کو بیان کرتے ہوئے انہوں نے بتایا کہ محبت کے بغیر دنیا میں کچھ نہیں ہے، کام کرنے کا کوئی ریاضیاتی فارمولہ نہیں ہے۔

نامور فلمساز کا کہنا تھا کہ ان کی اصل کرافٹ کام سے محبت اور پیار ہے اور اگر وہ کسی چیز سے محبت نہیں کرتے تو وہ اس کو تخلیق نہیں کرسکتے ہیں۔

واضح رہے کہ ایٹلی کی ہدایت کاری میں بننے والی فلم ’جوان‘ نے بلاک بسٹر فلم ’پٹھان‘ کے مجموعی بزنس 543 کروڑ کو پیچھے چھوڑ کر 546 کروڑ کا ہندسہ عبور کرلیا ہے۔