کندھ کوٹ؛ گھر میں راکٹ کا گولہ پھٹنے سے 4 بچوں سمیت 8 افراد جاں بحق

کندھ کوٹ: گھرمیں راکٹ کا گولہ پھٹنے سے 4 بچوں اور ایک خاتون سمیت 8افرادجاں بحق جب کہ 3 زخمی ہوگئے۔

ذرائع کے مطابق جاں بحق افراد میں ایاز سبزوئی، نیاز ، حنیفاں اور راشد سمیت 8 افراد شامل ہیں۔ افسوس ناک واقعہ گھوڑا گھٹ تھانے کی حدود علی نواز سبزوئی میں پیش آیا، جہاں اطلاعات کے مطابق راکٹ کا گولہ بچوں کو زمین میں ملا، جسے وہ گھرلے آئے۔ ایس ایس پی میر روحل خان کھوسہ  نے اس سلسلے میں کہا کہ معاملے کی مزید تفتیش کی جار رہی ہے۔

کندھ کوٹ، گھر میں راکٹ لانچر کا گولہ پھٹنے سے دھماکا 8 افراد جاں بحق، 3 زخمی#ExpressNews #BreakingNews pic.twitter.com/62dwg3fnwZ

— Express News (@ExpressNewsPK) September 27, 2023

دوسری جانب نگراں وزیراعلیٰ سندھ جسٹس (ر) مقبول باقر نے کندھ کوٹ میں راکٹ کا گولہ پھٹنے کے واقعے کا نوٹس لیتے ہوئے آئی جی پولیس سے رپورٹ طلب کرلی ہے۔ وزیراعلیٰ سندھ نے پوچھا کہ راکٹ لانچر کا گولہ زنگی سبزوئی گوٹھ میں کیسے پہنچا؟  کیا کوئی اسلحہ کی کھیپ کچے میں اسمگل ہو رہی تھی؟۔ کیا گوٹھ میں ڈکیتوں کے سہولت کار موجود ہیں؟  راکٹ لانچر کیسے بلاسٹ ہوئے، جس سے اتنا جانی نقصان ہوگیا؟، اس معاملے کی تفصیلی رپورٹ دی جائے۔

دریں اثنا پاکستان پیپلز پارٹی کے چیئرمین اور سابق وزیر خارجہ بلاول بھٹو زرداری نے معاملے پر تشویش کا اظہار کرتے ہوئے واقعے کی تحقیقات کا مطالبہ کیا ہے۔ بلاول بھٹو زرداری نے راکٹ کا گولہ پھٹنے سے ہونے والی ہلاکتوں پر افسوس کا اظہار کرتے ہوئے کہا کہ سندھ اور پنجاب کے کچے کے علاقوں کو اسلحہ سے پاک اور جرائم کی آماجگاہ بننے سے روکنا ہوگا۔