تین سال میں ہم نے آئی ایم ایف کو ملک بیچا ہے، فضل الرحمان

جمیعت علما اسلام کے سربراہ مولانا فضل الرحمان نے کہا ہے کہ گزشتہ تین سال میں ہم نے آئی ایم ایف کو پاکستان فروخت کیا ہے۔

خوشاب میں جلسے سے خطاب کرتے ہوئے فضل الرحمان نے کہا کہ ہر چند ماہ بعد آئی ایم ایف ایک نیا معاہدہ کررہا ہوتا ہے اور ہمیں اپنی شرائط پر امداد و قرض دیتا ہے اور ہم حکم مان کر سینہ چوڑا کرتے ہیں جبکہ عالمی اداروں کا کسی دوسرے ملک پر دباؤ نہیں ہے۔

انہوں نے کہا کہ گزشتہ تین سال میں ہم نے آئی ایم ایف کو ملک بیچا ہے، ہمارے ملک میں مافیاز ڈالرز کا استعمال کررہے ہیں جبکہ نشانے پر صرف سیاستدان ہوتا ہے اور پسِ پردہ حکمرانی بھی کوئی اور کرتا ہے۔

صرف سیاستدان نشانے پر ہوتا ہے، پس پردہ حکمرانی کوئی اور کرتا ہے،
پاکستان پر اسرائیل کو تسلیم کرنے کے لیے دباؤ ہے،مولانافضل الرحمان#ExpressNews #BreakingNews pic.twitter.com/BlfRCj51Zb

— Express News (@ExpressNewsPK) October 2, 2023

جے یو آئی کے سربراہ نے کہا کہ اسرائیل کو تسلیم کرنے کا دباؤ صرف پاکستان پر ہے، اسرائیل کو کیوں تسلیم کریں وہ تو ایک ناجائز حکومت ہے، فلسطین کو تسلیم کرنے والی بات کہاں چلی گئی۔

انہوں نے کہا کہ میں سوال کرنا چاہتا ہوں کہ اسلامی دنیا کے سربراہان بتائیں کہ فلسطین کے معاملے پر آپ کا مؤقف کہاں دفن ہوگیا۔

فضل الرحمان کا کہنا تھا کہ عام آدمی کی تربیت یوں کی جارہی ہے کہ صرف نماز پڑھ لی جائے جبکہ اسلام انسانی حقوق کے تحفظ کا باقاعدہ نظام رکھتا ہے۔ اُن کا کہنا تھا کہ جب تک قرآن و سنت کو رہنما نہیں سمجھیں گے تب تک خوشحالی نہیں آئے گی، پارلیمنٹ میں ایسے لوگوں کو بھردیا جاتا ہے جنہیں قرآن و سنت کا علم نہیں ہے۔