فوٹو سیشن میں کروشیائی وزیر کا جرمنی کی خاتون ہم منصب کو بوسہ؛ ویڈیو وائرل

ویب ڈیسک  اتوار 5 نومبر 2023
65 سالہ وزیر خارجہ سے جرمنی کی 42 سالہ خاتون وزیر خارجہ کا بوسہ لینے پر استعفے کا مطالبہ کیا جا رہا ہے، فوٹو: ویڈیو گریب

65 سالہ وزیر خارجہ سے جرمنی کی 42 سالہ خاتون وزیر خارجہ کا بوسہ لینے پر استعفے کا مطالبہ کیا جا رہا ہے، فوٹو: ویڈیو گریب

یورپی ملک کروشیا کے 65 سالہ وزیر خارجہ گورڈن گرلک ریڈمین نے فوٹوسیشن کے دوران جرمنی کی 42 سالہ وزیر خارجہ اینالینا شارلٹ کا بوسہ لے لیا جس کی ویڈیو وائرل ہوگئی۔

عالمی خبر رساں ادارے کے مطابق وائرل ویڈیو میں واضح طور پر دیکھا جا سکتا ہے کہ جرمن خاتون وزیر نے کروشیائی وزیر کے بوسہ لینے پر اپنے گالوں کا رخ موڑتے ہوئے بچنے کی ہر ممکن کوشش کی تھی۔

بوسہ لینے کی ویڈیو وائرل ہونے کے بعد سے کروشیائی وزیر خارجہ کو سخت تنقید کا نشانہ بنایا جا رہا ہے جس پر کروشیائی وزیرخارجہ نے معافی مانگ لی۔

کروشیائی وزیر خارجہ نے جب جرمنی کی خاتون وزیر کو بھرے مجمع میں بوسہ دیا تو وہ ہکا بکا رہ گئیں اور گروپ فوٹو کے لیے جمع دیگر ممالک کے وزرائے خارجہ بھی اس غیر متوقع حرکت پر دنگ رہ گئے تھے۔

کروشیا کی سابق خاتون وزیر اعظم سمیت متعدد خواتین رہنماؤں نے وزیر خارجہ سے منصب چھوڑنے کا مطالبہ بھی کردیا جب کہ یورپی یونین کے رکن ممالک نے بھی تعجب کا بھی اظہار کیا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔