پی ایس ایل9 ایڈیشن کی تاریخ کیلیے حکومت سے مشورہ کرنے کا فیصلہ

 لاہور: پاکستان سپرلیگ کی گورننگ  کونسل  نے نویں ایڈیشن کی تاریخ کو حتمی شکل دینے کیلیے حکومت  سے مشورہ کرنے کا فیصلہ کیا ہے۔ 

پاکستان سپر لیگ کی گورننگ کونسل کا اجلاس منگل کے روز پی سی بی منیجمنٹ کمیٹی کے چیرمین ذکا اشرف کی صدارت میں منعقد ہوا۔ نیشنل کرکٹ اکیڈمی لاہور میں ہونے والے اس اجلاس میں ایچ بی ایل پی سی ایل کی تمام چھ فرنچائزز کے نمائندوں اور پاکستان کرکٹ بورڈ کے حکام نے شرکت کی۔

اجلاس میں پاکستان سپر لیگ کے نویں ایڈیشن سے متعلق تمام امور پر تفصیلی غور کیا گیا جن میں آپریشنل اور لاجسٹیکل معاملات بھی شامل تھے۔ پی ایس ایل کے نویں ایڈیشن کا ڈرافٹ نیشنل ٹی20 کپ کے اختتام کے فوراً بعد دسمبر کے وسط میں ہو گا۔

مزید پڑھیں: پی ایس ایل9؛ سیروگیٹ ایڈورٹائزنگ پر دروازے مکمل بند

اجلاس میں اس بات پر مکمل اتفاق کیا گیا کہ چونکہ ملک میں عام انتخابات کے فروری 2024ء میں انعقاد کا اعلان کیا گیا ہے لہٰذا ایچ بی ایل پاکستان سپر لیگ  کے نویں ایڈیشن کی تاریخ کو حتمی شکل دینے کے سلسلے میں حکومت  سے مشورہ کیا جائے۔

مزید پڑھیں: حکومت کی پی ایس ایل کی اسپانسرڈ جوا کھیلنے والی کمپنیوں پر پابندی

پی سی ایل کی فرنچائزز نے پاکستان کرکٹ بورڈ سے یہ بھی کہا کہ پی ایس ایل کے میڈیا حقوق کی فروخت کے عمل کو تیز کیا جائے۔