بورڈ میں تبدیلیوں سے کرکٹ اور کرکٹرز کو نقصان نہیں ہونا چاہئے، شاہد آفریدی

لاہور: قومی ٹیم کے مایہ ناز آل راؤنڈر بوم بوم آفریدی کا کہنا ہے کہ  کرکٹ بورڈ میں تبدیلیوں سے کرکٹ اور کرکٹرز کو نقصان نہیں ہونا چاہیئے ۔

قذافی اسٹیڈیم لاہور میں دورہ سری لنکا کے لئے لگائے گئے کیمپ کے اختتام پر میڈیا سے بات چیت کرتے ہوئے شاہد آفریدی کا کہنا تھا کہ انہیں کرکٹ کھیلتے ہوئے 18 سال ہوگئے لیکن  وہ کبھی  بھی کپتانی کے پیچھے نہیں بھاگے۔ انہوں نے کہا کہ قومی ٹیم کی قیادت  پھولوں کی سیج نہیں بلکہ بھاری ذمہ داری ہے اور ہر کھلاڑی کی خواہش ہوتی ہے کہ اسے کامیابی حاصل ہو۔

ماضی میں سابق کوچ وقار یونس کے ساتھ تنازع کے حوالے سے پوچھے گئے سوال پر بوم بوم آفریدی کا کہنا تھا کہ اگر پاکستان کرکٹ کو پھلتے پھولتے دیکھنا ہے تو ماضی کی تلخیاں بھلا کر آگے بڑھنا ہوگا اور اسی میں پاکستان کرکٹ کی بہتری ہے ۔