لاہور میں موٹرسائیکل سواروں کی کالج بس پر فائرنگ، 2 طالبات زخمی

ویب ڈیسک  منگل 28 نومبر 2023
نجی کالج کے بچے کشمیر ٹرپ پر جا رہے تھے

نجی کالج کے بچے کشمیر ٹرپ پر جا رہے تھے

 لاہور: موٹر سائیکل سواروں نے کالج کی بس پر فائرنگ کردی، جس میں  2 طالبات زخمی ہو گئیں۔

صوبائی دارالحکومت میں سندر کے علاقے موہلنوال کے قریب ملتان روڈ پر نامعلوم موٹر سائیکل سواروں نے نجی کالج کی بس پر فائرنگ کردی، جس میں 2 طالبات زخمی ہو گئیں۔

پولیس کے مطابق نجی کالج کے بچے کشمیر ٹرپ پر جا رہے تھے کہ نامعلوم افراد نے موہلنوال کے قریب بس پر فائرنگ کردی، جس میں زد میں آکر عائشہ اور نمرہ نامی کالج کی 2 طالبات زخمی ہو گئیں، جنہیں جنرل اسپتال لاہور منتقل کردیا گیا ہے۔

نامعلوم ملزمان کی فائرنگ سے زخمی ہونے والی طالبہ  طائشہ کی حالت تشویش ناک بتائی جاتی ہے، جو جنرل اسپتال کے انتہائی نگہداشت وارڈ میں ہے۔ سندر پولیس نے واقعے کا مقدمہ زخمی طالبہ عائشہ کے بھائی سلیمان کی مدعیت میں درج کر کے تحقیقات شروع کردی ہے۔

پولیس کی جانب سے ملزمان کی گرفتاری کے لیے اے ایس پی رائیونڈ شاہ رخ خان کی سربراہی میں خصوصی ٹیمیں تشکیل  دے دی گئی ہیں۔ ایس پی صدر سدرہ خان کے مطابق ملزمان کی گرفتاری کے لیے تمام تر وسائل بروئے کار لائے جارہے ہیں۔ جلد ہی ملزمان پولیس کی گرفت میں ہوں گے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔