وزیراعظم بنتے ہی مودی نے نئے آرمی چیف کے نام کا اعلان کردیا

ویب ڈیسک  بدھ 12 جون 2024
نئے آرمی چیف جموں کشمیر میں بھی تعینات رہے ہیں اور چین کیساتھ سرحدی معاملات میں متحرک کردار ادا کرچکے ہیں

نئے آرمی چیف جموں کشمیر میں بھی تعینات رہے ہیں اور چین کیساتھ سرحدی معاملات میں متحرک کردار ادا کرچکے ہیں

نئی دہلی: مودی سرکار نے لیفٹیننٹ جنرل اوپیندرا دویدی کو بھارتی فوج کا نیا آرمی چیف نامزد کر دیا۔

بھارتی وزارت دفاع کی جانب سے جاری بیان میں کہا گیا ہے کہ موجودہ آرمی چیف جنرل منوج پانڈے کو گزشتہ ماہ ریٹائرڈ ہونا تھا لیکن ملک میں ہونے والے انتخابات کے پیش نظر انھیں ایک ماہ کی توسیع دیدی گئی تھی جو 30 جون کو ختم ہوجائے گی۔

جس کے بعد وائس چیف آف آرمی اسٹاف لیفٹیننٹ جنرل اوپیندرا دویدی چارج سنبھالیں گے جو  بھارتی فوج میں اپنے 40 سالہ کیریئر میں کئی اہم پوسٹوں پر فرائض انجام دے چکے ہیں۔

بھارتی فوج میں بھرتی ہونے کے بعد انھوں نے امریکی آرمی وار کالج سے ڈیفنس اینڈ منیجمنٹ اسٹڈیز میں فیلو شپ کی۔ علاوہ ازیں وہ اسٹرٹیجک اسٹڈی اور ملٹری سائنس میں ماسٹرز کی ڈگری بھی رکھتے ہیں۔

لیفٹیننٹ جنرل اوپیندرا دویدی کی تعیناتی جموں کشمیر میں بھی رہی اور وہ چین کے ساتھ سرحدی معاملات میں بھی کافی متحرک کردار ادا کرچکے ہیں۔

 

 

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔