کراچی: ڈاکوؤں کی فائرنگ سے ایک شہری جاں بحق، خاتون سمیت متعدد زخمی

طحہ عبیدی  جمعرات 20 جون 2024
پولیس نے بتایا کہ فائرنگ کے واقعات میں ایک خٓاتون بھی زخمی ہوئیں—فوٹو: فائل

پولیس نے بتایا کہ فائرنگ کے واقعات میں ایک خٓاتون بھی زخمی ہوئیں—فوٹو: فائل

  کراچی: شہر کے مختلف علاقوں میں ڈاکوؤں کی فائرنگ سے ایک شہری جاں بحق اور خاتون سمیت 7 افراد زخمی ہوگئے۔

پولیس کے مطابق کورنگی کے علاقے زمان ٹاؤن میں ڈاکوؤں کی فائرنگ سے شہری جاں بحق ہوگیا اور ان کا بیٹا زخمی ہوگیا۔

کورنگی میں ڈکیتی کا ایک اور واقعہ چکرا گوٹھ میں پیش آیا جہاں ڈکیتی مزاحمت پر فائرنگ سے دو افراد  زخمی ہوگئے، جن کی شناخت قدیر اور احتشام کے نام سے ہوئی۔

پولیس کا کہنا تھا کہ ملزمان نے شہریوں سے موٹرسائیکل چھیننے کی کوشش کی لیکن شہریوں کی جانب سے مزاحمت کرنے پر ملزمان نے فائرنگ کی اور فرار ہوگئے۔

زخمیوں کو طبی امداد کے لیے جناح اسپتال منتقل کردیا گیا۔

ادھر نارتھ کراچی میں فائرنگ سے شہری زخمی ہوا اور سرجانی کے علاقے میں ڈاکوؤں کی فائرنگ سے ارشد نامی شہری زخمی ہوگیا۔

پولیس کا مزید کہنا تھا کہ سی ویو میں دو دریا کے قریب فائرنگ سے ایک خاتون سمیت 3 افراد زخمی ہوئے، جنہیں ہسپتال منتقل کردیا گیا ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔