غزہ جنگ پر امریکی فضائیہ کے 2 پائلٹوں نے احتجاجاً استعفیٰ دیدیا

ویب ڈیسک  پير 24 جون 2024
جنگ مخالف امریکی تنظیم نے دعویٰ کیا ہے کہ 40 دیگر فوجی اہلکار بھی مستعفی ہونے پر غور کر رہے ہیں

جنگ مخالف امریکی تنظیم نے دعویٰ کیا ہے کہ 40 دیگر فوجی اہلکار بھی مستعفی ہونے پر غور کر رہے ہیں

 واشنگٹن: امریکی فضائیہ کے دو پائلٹس نے غزہ جنگ میں مسخ شدہ بچوں کی لاشوں پر اسرائیل کے خلاف شدید احتجاج کرتے ہوئے اپنے عہدوں سے استعفیٰ دیدیا۔ 

عالمی خبر رساں ادارے کے مطابق مستعفی ہونے والے امریکی ایئر فورس کے باضمیر پائلٹوں نے کہا کہ غزہ میں جنگی جرائم ناقابل برداشت ہیں۔ مسخ شدہ بچوں کی دل خراش ہزاروں ویڈیوز ہمارے موبائل فونز تک پہنچ رہی ہیں۔

امریکی پائلٹس نے مزید کہا کہ یہ دل گدزا ویڈیوز فوج کے اندر اور باہر امریکی عوام کے ضمیر کو جھنجھوڑ رہی ہیں۔ یہ سب امریکی اور بین الاقوامی قوانین کی سنگین خلاف ورزی ہے۔

امریکن ایئر فورس کے پائلٹس نے یہ بھی کہا کہ اس جارحیت اور ظلم کے خلاف احتجاج کرتے ہوئے اپنے عہدوں سے مستعفی ہونے کا فیصلہ کیا ہے۔

دوسری جانب جنگ مخالف ایک امریکی تنظیم نے دعویٰ کیا ہے کہ امریکی فوج کے 40 سے زائد دیگر اہلکار بھی غزہ جنگ کے خلاف مستعفی ہونے پر غور کر رہے ہیں۔

خیال رہے کہ امریکی صدر جوبائیڈن اسرائیل کے غزہ پر حملے کی حمایت کر رہے ہیں جس کے باعث وہ خود صدارتی الیکشن میں مقبولیت کھوتے جا رہے ہیں۔

 

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔