بھارتی اقلیتیں خصوصاً ہمیشہ سے مودی سرکار کو کھٹکتی رہی ہیں، جس کی بنا پر انہیں ہمیشہ بھارتی حکومت کے عتاب کا نشانہ بننا پڑتا ہے ۔
مودی سرکار کے اقتدار میں آنے کے بعد گزشتہ ایک دہائی سے بھارت میں اقلیتیں خود کو غیر محفوظ سمجھتی ہیں جب کہ مودی نے حالیہ انتخابات میں بھی اس بات کو واضح کر دیا ہے کہ "مودی بھارت کو اقلیتوں سے پاک کر کے صرف ہندوتوا ریاست کے قیام کو یقینی بنائے گا۔"
بھارت میں آئے روز مودی سرکار کی جانب سے اقلیتوں پر ہونے والے مظالم اس بات کی عکاسی کرتے ہیں کہ بھارت میں اقلیتوں کے لیے کوئی جگہ نہیں۔ انتخابات سے قبل بھی مودی نے جہاں دیگر اقلیتوں کو نشانے پر رکھا، وہیں ہمیشہ کی طرح مسلمانوں کے خلاف بھی مسلسل زہر اُگلا۔
انتہا پسند مودی سرکار نے نہ صرف مسلمانوں کو ناسور کہا بلکہ اُن کے گھروں، دکانوں حتی کہ مساجد کو بھی مذموم مہم کے تحت مسمار کیا۔ بھارتی انتخابات میں مسلمان مخالف کارڈ کا میابی سے کھیلنے کے بعد اب مودی سرکار مسلم دشمنی میں نئے سرے سے عملی اقدامات پر اتر آئی ہے۔
مودی سرکار نے بھارتی مسلمانوں، آدیواسیوں اور دلتوں کے خلاف نئے فوجداری قوانین متعارف کروا دیے ہیں، جن میں بھارتیہ نیا سنہیتیا(BNS)، بھارتیہ ساکشیہ دھینیم (BSA) اور بھارتیہ نگاری سرکشہ سنہیتا(BNSS) شامل ہیں ۔بی این ایس، بی ایس اے اور بی این ایس ایس قوانین کا اطلاق یکم جولائی سے کیا جا چکا ہے ۔
آل انڈیا مجلس اتحاد المسلمین کے صدر اسد الدین اویسی کا کہنا تھا کہ مودی سرکار کی جانب سے نافذ کیے گئے یہ ظالمانہ قوانین اب بھارت میں مسلمانوں، دلتوں اور دیگر متوسط طبقات کے خلاف استعما ل ہوں گے۔ بھارتیہ نیا سنہیتیا(BNS)، بھارتیہ ساکشیہ دھینیم(BSA) اور بھارتیہ نگاری سرکشہ سنہیتا(BNSS) سے کمزور طبقات کے حقوق مزید سلب کرتے ہوئے بھارتی پولیس کو ان کے خلاف کارروائیوں کے لیے وسیع تر اختیارات حاصل ہوں گے۔
رکن پارلیمنٹ حیدر آباد کا کہنا تھا کہ ان قوانین میں کہیں بھی اس با ت کا ذکر نہیں کیا گیا کہ اگر بھارتی پولیس سے کوئی جرم سرزد ہو جاتا ہے تواُس کے خلاف کیا کارروائی عمل میں لائی جائے گی؟ یہ یکطرفہ قوانین ہیں۔ یہ نئے قوانینUAPAکے قانون سے بھی زیادہ خطرناک ہیں۔
سوال یہ ہے کہ آخر کب تک مودی سرکار کی ظالمانہ پالیسیوں کے خلاف انسانی حقو ق کی تنظیمیں خاموش رہیں گی؟ کیا مودی کے اقتدار میں رہتے ہوئے بھارت کی مظلوم اقلیتوں کو کبھی انصاف ملے گا؟