دورہ آسٹریلیا میں شامل 7 کھلاڑی بنگلادیش کیخلاف سیریز سے ڈراپ

رواں برس جنوری میں دورہ آسٹریلیا دوران ٹیسٹ سیریز کھیلنے والی ٹیم کے 7 کھلاڑی بنگلادیش کیخلاف ٹیسٹ سیریز کیلئے اسکواڈ میں جگہ بنانے میں ناکام ہوگئے۔

بورڈ کی جانب سے جاری کردہ اعلامیے کہا گیا ہے کہ رواں برس آسٹریلیا کیخلاف ٹیسٹ سیریز میں شامل اوپنر امام الحق، آل راؤنڈر فہیم اشرف، فاسٹ بولر حسن علی (انجری)، محمد وسیم جونئیر، اسپنر محمد نواز، ساجد خان اور نعمان علی اسکواڈ میں جگہ نہ بناسکے۔

دوسری جانب نوجوان محمد ہریرہ، کامران غلام اور محمد علی کو ڈومیسٹک کرکٹ اور پاکستان شاہینز کی طرف سے عمدہ کارکردگی کی بنیاد پر اسکواڈ کا حصہ بنایا گیا ہے۔

مزید پڑھیں: ‘شاہین ٹیسٹ ٹیم کی نائب کپتانی سے بھی ہاتھ دھو بیٹھے’

قبل ازیں پی سی بی نے بنگلادیش کیخلاف ٹیسٹ سیریز کیلئے 17 رکنی اسکواڈ کا اعلان کیا تو کپتان شان مسعود جبکہ نائب کپتان سعود شکیل کو نامزد کیا۔

مزید پڑھیں: پاکستان کا بنگلادیش کیخلاف سیریز کیلئے 17 رکنی اسکواڈ کا اعلان

اسکواڈ کے دیگر کھلاڑیوں میں عامر جمال ( فٹنس سے مشروط)، عبداللہ شفیق، ابرار احمد، بابر اعظم، کامران غلام، خرم شہزاد، میر حمزہ، محمد علی، محمد ہریرہ، محمد رضوان ( وکٹ کیپر)، نسیم شاہ، صائم ایوب، سلمان علی آغا، سرفراز احمد (وکٹ کیپر) اور شاہین شاہ آفریدی۔