وقار یونس کی تقرری؛ لاہور ہائیکورٹ نے سماعت تعطیلات کے بعد تک ملتوی کردی

پاکستان کرکٹ بورڈ (پی سی بی) چیئرمین محسن نقوی کے ایڈوائزر وقار یونس کی تقرری پر لاہور ہائیکورٹ میں سماعت عدالتی تعطیلات کے بعد تک ملتوی کردی گئی۔

لاہور ہائیکورٹ میں چیئرمین پاکستان کرکٹ بورڈ (پی سی بی) کے ایڈوائزر وقار یونس کی تقرری کیخلاف دائر درخواست پر سماعت ہوئی، عدالت نے درخواست گزار کو تقرری کا نوٹیفیکیشن درخواست کے ساتھ لگانے کی ہدایت کرتے ہوئے سماعت ملتوی کردی۔

عدالت نے درخواست گزار کے وکیل سے استفسار کیا کہ کرکٹ قوانین کیا کہتے ہیں آپ کس طرح متاثرہ فریق ہیں، جس پر وکیل نے جواب دیا کہ میں پاکستان کا شہری ہوں۔

مزید پڑھیں: لاہور ہائیکورٹ: وقار یونس کی تقرری کے خلاف درخواست سماعت کیلئے مقرر

درخواست گزار کے وکیل نے عدالت میں موقف اپنایا کہ وقار یونس کی تقرری کا نوٹیفیکیشن اشتہار کے بغیر جاری کیا گیا، بطور ایڈوائزر سابق کرکٹر کی تقرری قانون کے منافی ہے۔

مزید پڑھیں: سابق کپتان وقار یونس نے پی سی بی میں ذمہ داریاں سنبھال لیں

درخواست میں استدعا کی گئی ہے کہ لاہور ہائیکورٹ وقار یونس کی بطور ایڈوائزر ٹو چئیرمین پی سی بی تقرری کالعدم قرار دے۔

لاہور ہائیکورٹ میں مقدمے کی سماعت معزز جسٹس شہرام سرور چوہدری نے کی جبکہ درخواست گزار کی جانب سے ندیم سرور ایڈووکیٹ پیش ہوئے۔