غزہ میں اسرائیلی جارحیت کا جواب پابندیوں سے دیا جائے، فلسطینی سفیر کا مطالبہ

 نیویارک: اقوام متحدہ میں فلسطین کے سفیر ریاض منصور نے سلامتی کونسل سے مطالبہ کیا ہے کہ غزہ میں اسرائیلی جارحیت کا جواب پابندیوں کے ساتھ دیا جائے. انہوں نے یہ مطالبہ اسرائیل کی جانب سے غزہ میں بے گھر فلسطینیوں کو پناہ دینے والے اسکول پر مہلک فضائی حملے کے حوالے سےالجزائر کی طرف سے بلائے گئے 15 رکنی کونسل کے ہنگامی اجلاس کے دوران کیا ۔

اے پی پی کے مطابق انہوں نے اسرائیلی ایلچی گیلاد اردان کی طرف اشارہ کرتے ہوئے کہا کہ میں واضح طور پر بتانا چاہتا ہو ں کہ اسرائیل کو آپ کی مذمتوں کی کوئی پرواہ نہیں ہے اور وہ آپ کی قراردادوں کو مسترد کرتا ہےاور آپ کے مبا حثوں کو بھی نہیں سنتا ہے۔

انہوں نے کہا کہ ایسی کوئی چیز نہیں جو فلسطینیوں کے خلاف اسرائیلی کارروائیوں کو جواز بنا سکے۔ غزہ میں جو کچھ ہو رہا ہے وہ یرغمالیوں کے بارے میں نہیں ہے۔ یہ بات بہت پہلے سے ظاہر ہو گئی تھی کہ یہ اسرائیلی حکومت کو یرغمالیوں کی کوئی پرواہ نہیں ہے۔