نور بخاری پاکستان کا مذاق اُڑانے والوں پر پھٹ پڑیں

اس ملک کی قدر کرلیں، ورنہ یہ نعمت آپ سے چھین جائے گی، سابقہ اداکارہ

ویب ڈیسک جمعرات 15 اگست 2024

فوٹو : فائل

لاہور: اسلام کی خاطر شوبز انڈسٹری سے کنارہ کشی اختیار کرنے والی سابقہ فلم اسٹار نور بخاری نے یومِ آزادی کے موقع پر پاکستان کا مذاق اُڑانے والوں کو آڑے ہاتھوں لے لیا۔

نور بخاری نے اپنے آفیشل انسٹاگرام ہینڈل کی اسٹوری میں جاری کیے گئے پیغام میں کہا کہ صبح سے میری نظروں کے سامنے ایسی کئی ویڈیوز آئی ہیں جن میں میرے ملک کا مذاق اُڑایا جارہا ہے۔

سابقہ اداکارہ نے کہا کہ یہ ملک ہماری ماں ہے، اس ملک کا مذاق اُڑانا ہنسنے کی بات نہیں ہے بلکہ یہ ہم سب کے لیے ڈوب مر جانے کا مقام ہے کہ پاکستان کے اپنے ہی لوگ اس کا مذاق اُڑا رہے ہیں۔

اُنہوں نے شدید غصے کا اظہار کرتے ہوئے کہا کہ اس آزاد ملک کی قدر کرلیں، ورنہ یہ نعمت آپ سے چھین جائے گی۔

نور بخاری نے مزید کہا کہ اگر یہ ملک نہ ہوتا تو آج ہم بھی نہ ہوتے، پاکستان کی وجہ سے ہی ہماری پہچان ہے۔

سابقہ اداکارہ کی یہ اسٹوری سوشل میڈیا پر وائرل ہوئی تو صارفین کی بڑی تعداد نے نور بخاری کی بات سے اتفاق کیا اور کہا کہ جس کو پاکستان نہیں پسند وہ یہاں سے اپنا سامان اُٹھائے اور کسی دوسرے ملک منتقل ہوجائے لیکن ہمارے ملک میں بیٹھ کر بُرائیاں نہ کریں۔