اسرائیل، حزب اللہ کشیدگی، بیروت ہوائی اڈے پر پروازیں منسوخ

بیروت: حزب اللہ اور اسرائیل کے درمیان کشیدگی کے پیش نظر بیروت ہوائی اڈے پر پروازیں منسوخ کر دی گئی ہیں۔

لبنان کے واحد بین الاقوامی ہوائی اڈے پر درجنوں مسافر گزشتہ روز بے چینی سے اپنی فلائٹس کا انتظار کرتے رہے مگر بیشتر پروازیں منسوخ کر دی گئی ہیں۔

غیر ملکی میڈیا کے مطابق اسرائیل اور حزب اللہ کی جانب سے سرحد پار جھڑپوں میں اضافے کے بعد بیروت بین الاقوامی ہوائی اڈہ کام کر رہا تھا لیکن بڑی ایئرلائنز کی جانب سے پروازیں معطل کرنے کے اعلان کے بعد بہت سے مسافر پھنس گئے ہیں۔

اردن کے راستے امریکہ جانے والے ایک مسافر الہام شکیر نے بتایا کہ ہم مقامی وقت کے مطابق صبح ساڑھے چار بجے اپنی پرواز کے لیے آئے لیکن انہوں نے ہمیں بتایا کہ پرواز منسوخ کر دی گئی ہے۔

اسرائیل نے گزشتہ روز لبنان میں فضائی حملے کرتے ہوئے کہا تھا کہ اس نے بڑے پیمانے پر حزب اللہ کے حملے کو ناکام بنا دیا ہے۔

جبکہ لبنانی گروپ نے گزشتہ ماہ اسرائیلی حملے میں ایک اعلی کمانڈر فواد شکر کی ہلاکت کا بدلہ لینے کے لیے سرحد پار حملوں کا اعلان کیا تھا۔