پنجاب میں اشیائے ضروریہ کی قیمتیں دوسرے صوبوں کے مقابلے میں کم ہیں، وزیراعلی کو بریفنگ

مری: پاکستان ادارہ شماریات نے وزیراعلیٰ مریم نواز کو بریفنگ میں بتایا ہے کہ پنجاب میں تمام اشیائے ضروریہ کی قیمتیں دیگر صوبوں کے مقابلے میں کم ہیں۔

تفصیلات کے مطابق وزیراعلیٰ پنجاب مریم نواز شریف نے مری سے لاہور پہنچتے ہی پرائس کنٹرول پر خصوصی اجلاس طلب کیا، جس میں انہیں ادارہ شماریات کی جانب سے اشیائے ضروریہ کی قیمتوں پر تفصیلی بریفنگ دی گئی۔

بریفنگ میں بتایا گیا کہ پنجاب میں ضروری اشیاء خورد و نوش کے نرخ تمام دوسرے صوبوں کی نسبت سب سے کم ہے۔ وزیر اعلیٰ مریم نواز شریف کا صوبے میں پرائس کنٹرول پر اظہار اطمینان، انتظامی کاوشوں کو سراہا۔

وزیر اعلیٰ مریم نواز شریف نے صوبہ بھر میں روٹی کی مقررہ نرخ پر فروخت یقینی بنانے کی ہدایت کرتے ہوئے ہر ضلع میں قیمتوں پر نظر رکھنے کی ہدایت کی اور آٹے و روٹی کے نرخ معلوم کیے۔

انہوں نے کہا کہ کسی بھی شہر میں روٹی مقررہ نرخ سے زائد فروخت کرنے کی ہرگز اجازت نہ دی جائے، صوبہ بھر کی عوام کو کنٹرولڈ ریٹ پر آٹا فراہم کیا جائے-

سیکرٹری انڈسٹری احسان بھٹہ نے پرائس کنٹرول چیکنگ کے بارے میں تفصیلی بریفنگ دی جبکہ اجلاس میں سینٹر پرویز رشید ، چیئرپرسن ٹاسک فورس سلمہ بٹ، ایم پی اے ثانیہ عاشق، چیف سیکرٹری زاہد اختر زمان ، پرنسپل سیکرٹری ساجد ظفر ڈال، سیکرٹری انڈسٹری، سیکرٹری زراعت اور دیگر متعلقہ حکام بھی موجود تھے۔