اقتصادی رابطہ کمیٹی نے ہوم رمیٹنسز پر نظر ثانی کی منظوری دے دی

  کراچی:  کابینہ کی اقتصادی رابطہ کمیٹی(آی سی سی)  نے ہوم رمیٹنسز سکیم پر نظر ثانی کی منظوری دیدی ہے۔

تفصیلات کے مطابق کابینہ کی اقتصادی رابطہ کمیٹی( ای سی سی) کا اجلاس وزیر خزانہ محمد اورنگزیب کی زیر صدارت منعقد ہوا، جس میں تین نکاتی ایجنڈے پر غور کیا گیا۔ اجلاس میں 39کلو میٹر طویل چکدرہ، تیمر گرہ روڈ پراجیکٹ کی منظوری کے علاوہ سی پیک کے تحت تھانہ کوٹ، رائے کوٹ کی ری الائنمنٹ کیلئے پاکستان اور چین کے درمیان فریم ورک ایگریمنٹ پر عملدرآمد کی بھی منظوری دی گئی ہے۔

اجلاس میں آی سی کی طرف سے منظور کردہ نظرثانی شدہ ہوم رمیٹنسز اسکیم کے تحت بینکنگ چینل سے ترسیلات زر بھجوانے پر مراعات بڑھانے کی منظوری دی گئی، جس کے تحت ای سی سی نے ایکسچینج کمپنیوں کیلیے مالی مراعات کو فکس اور قابل تغیر دو حصوں میں تقسیم کردیا ہے اورفکس کمپوننٹ پرسو فیصد زرمبادلہ انٹرچینج مارکیٹ سے اسٹیٹ بینک کے مجاز بینکوں میں جمع کروانے والی ایکسچینج کمپنیوں کیلیے مالی فائدے کو ایک روپے فی ڈالر سے بڑھا کر دو روپے ڈالر کرنے کی منظوری دی ہے۔

اس کے علاوہ قابل تغیر کمپوننٹ کیلئے انٹرچینج مارکیٹ سے اسٹیٹ بینک کے مجاز بینکوں میں جمع کروائے جانے والے زرمبادلہ میں پانچ فیصد یا اڑھائی کروڑ ڈالر تک کی رقم پر تین روپے فی ڈالر فراہم کئے جائیں گے۔ علاوہ ازیں پانچ فیصد اضافے یا اڑھائی کروڑ ڈالر سے زائد مالیت کا زرمبادلہ جمع کروانے والی ایکسچینج کمپنیوں چار روپے فی ڈالر کے حساب سے ادائیگیاں کی جائیں گی۔

ای سی سی نے نظر ثانی شدہ ہوم رمیٹنسز اسکیم  کے تحت ٹیلی گرافک ٹرانسفر(ٹی ٹی)چارجز اسکیم کے ذریعے ترسیلاز زر جمع کروانے والے مجاز ڈیلروں کیلئے مالی فائدے کو  فکس اور قابل تغیر حصوں میں تقسیم کیا گیا ہے۔ ٹی ٹی کے زریعے اوورسیز پاکستانیوں کی سو ڈالر تک کی ترسیلات زر بھجوانے اور پاکستان میں وصول کرنے پر کسی قسم کے چارجز نہیں ہوں گے تاہم پہلے جن مجاذ ڈیلرز کے ذریعے یہ رقم منتقل کی جاتی تھی انہیں فکس رقم ملتی تھی اب اسے بھی دو حصوں میں تقسیم کیا گیا ہے۔

حکومت نے پچھلے سال ای سی سی کی منظوری سے اوور سیز ترسیلات زر فنانشل انسٹی ٹیوشنز اور پاکستانی بینکوں کے درمیان شیئر ہونیوالی ٹرانزیکشنز پر مالی فائدے 20 ایس اے آر سے بڑھا کر 30ایس اے آر کردیا تھا اب فکس کمپوننٹ پر 20ایس اے آر فی ٹرانزیکشن ملے گا تاہم قابل تغیر کمپوننٹ پر دس فیصد تک اضافے یا دس کروڑ ڈالر تک کی ٹرانزیکشن پر آٹھ ڈالر فی ٹرانزیکشن کے حساب سے اضافی ملا کریں گےجبکہ اگلے دس فیصد تک اضافے یا دس کروڑ ڈالر سے زائد مالیت کی ٹرانزیکشن پر سات روپے فی ٹرانزیکشن اضافی ملیں گے۔