بلوچستان میں سیکیورٹی اداروں کی استعداد میں اضافہ کیا جارہا ہے، وزیراعظم

  اسلام آباد: وزیراعظم شہباز شریف نے کہا ہے کہ بلوچستان میں قانون نافذ کرنے والے اداروں کی استعداد میں اضافہ کیا جارہا ہے، وفاقی حکومت بلوچ نوجوانوں کو تعلیم اور ترقی کے مواقع فراہم کرنے کیلئے بلوچستان حکومت سے مکمل تعاون کرے گی۔

یہ بات انہوں ںے وفاقی کابینہ کے اجلاس کی صدارت کرتے ہوئے کہی۔ اجلاس میں وزیرِ اعظم نے کابینہ کو اپنے گزشتہ روز کے دورۂ کوئٹہ کے حوالے سے اعتماد میں لیا۔

وزیراعظم نے کہا کہ بلوچستان میں قانون نافذ کرنے والے اداروں بشمول پولیس و لیویز کی استعداد میں اضافہ کیا جارہا ہے، دہشت گردی کے عفریت کو جڑ سے اکھاڑ پھینکنے اور انہیں عبرت کا نشان بنانے کیلئے پوری قوم پُرعزم ہے۔

یہ بھی پڑھیں : وزیراعظم کی فضل الرحمان سے ملاقات، سیاسی صورت حال پر گفتگو

وزیرِاعظم نے کہا کہ بلوچستان کی صوبائی حکومت بلوچ نوجوانوں کو قومی دھارے میں لانے، ان کی ترقی و خوشحالی کیلئے قابلِ ستائش اقدامات کر رہی ہے، وفاقی حکومت بلوچ نوجوانوں کو عالمی معیار کی تعلیم اور یکساں ترقی کے مواقع فراہم کرنے کیلئے بلوچستان حکومت سے مکمل تعاون کرے گی۔

وفاقی کابینہ نے چین پاکستان راہداری سی پیک کے کلیدی منصوبے مین لائن ون ( ایم ایل ون) کی اپ گریڈیشن کے لیے چین اور پاکستان کی ریلویز کے مابین ایم ایل ون کے پہلے مرحلے پر مالیاتی یقین دہانی (فنانشیل کمٹمنٹ ایگریمنٹ) کے حوالے سے مذاکرات شروع کرنے کی منظوری دے دی۔

کابینہ نے ہدایت کی کہ حتمی معاہدہ منظوری کے لیے کابینہ کے سامنے دوبارہ پیش کیا جائے۔ کابینہ نے اقتصادی رابطہ کمیٹی کے 29 اگست 2024ء کے اجلاس میں لئے گئے فیصلے کی توثیق کردی۔