طوفانی بارش؛ قطرائیرویز کی کراچی ائیرپورٹ پر لینڈنگ کی متعدد کوششیں ناکام، مسقط روانہ

کراچی میں نصف شب سے صبح تک ہونے والی طوفانی بارش کے باعث کراچی ائیرپورٹ پر آنے والی غیر ملکی ائیرلائن کے طیارے کا رخ مسقط ایئرپورٹ کی طرف موڑ دیا گیا۔

دوحہ سے کراچی آنے والی قطرائیرویز کی پرواز QR610 کو مسقط ائیرپورٹ پر لینڈ کرایا گیا۔ طیارے نے کئی بار کراچی ائیرپورٹ پر لینڈنگ کی کوشش کی لیکن ناکام رہا۔

لینڈنگ میں ناکامی پر پرواز کو کراچی سے مسقط ڈائیورٹ کیا گیا۔ 250 سے زائد مسافروں کو مسقط ائیرپورٹ پر انتظار کرنا پڑا۔ کئی گھنٹے بعد موسم بہتر ہونے پر پرواز مسقط سے واپس کراچی لینڈ کرگئی۔

ذرائع کے مطابق قطرائیرویز کی پرواز QR610 روزانہ صبح 7 بجے کراچی ائیرپورٹ لینڈ کرتی ہے۔