پاکستان کسٹمز کی کارروائی، جناح ٹرمینل پر بیرون ملک سے منشیات اسمگلنگ کی کوشش ناکام

  کراچی: پاکستان کسٹمز جناح انٹرنیشنل ایئرپورٹ کلکٹریٹ نے موصولہ خفیہ اطلاع پر ایک کارروائی میں بیرون ملک سے منشیات اسمگل کرنے کی کوشش ناکام بنا دی۔

حکام کو اطلاع موصول ہوئی تھی کہ منشیات کی اسمگلنگ انٹرنیشنل میل آفس کے ذریعے کی جا رہی ہے جس پر کسٹمز حکام کی جانب سے خفیہ نیٹ ورک سے موصول ہونے والی اطلاع پر بینکاک سے آنے والے پارسل کی جانچ کی گئی تو اس سے 500 گرام منشیات ماریجوانا (کینابیس) برآمد ہوئی۔

ذرائع نے بتایا کہ منشیات ماریجوانا بینکاک سے بک کرائی گئی تھی جسے تازہ تھائی ادرک کے پارسل میں چھپائی گئی تھی منشیات پر مشتمل یہ پارسل کراچی میں گلستان جوہر کے پتے پر بھیجا گیا تھا۔

ذرائع نے بتایا کہ برآمد کی گئی منشیات کی مالیت 22 لاکھ 50 ہزار روپے ہےکسٹمز حکام نے مقدمہ درج کر کے ملزمان کی گرفتاری کے لیے کارروائی کا آغاز کردیا ہے۔

ذرائع نے بتایا کہ پارسل کے ذریعے انسداد منشیات کی یہ کارروائی کلکٹر کسٹمز عدیم خان کے حکم پر اے ڈی سی محمد فیصل خان اور اے سی شرجیل عباس وسان کی سربراہی میں کی گئی۔