امریکا نے وینزویلا کے صدر کا طیارہ ضبط کر لیا

میامی: امریکا نے وینزویلا کے صدر نکولس مادورو کے ڈومینیکن ریپبلک میں موجود طیارے کو اپنی تحویل میں لے لیا ہے۔

امریکی حکام نے ڈوسالٹ فالکن 900 ای ایکس نجی طیارہ فلوریڈا پہنچا دیا ہے جسے مادورو اور ان کی حکومت کے ارکان استعمال کرتے تھے۔

امریکی محکمہ انصاف کا کہنا تھا کہ یہ طیارہ غیر قانونی طور پر خریدا گیا تھا۔

اٹارنی جنرل میریک گارلینڈ نے ایک بیان میں کہا کہ محکمہ انصاف نے ایک ایسا طیارہ قبضے میں لے لیا ہے جس کے بارے میں ہمارا الزام ہے کہ اسے ایک کمپنی کے ذریعے ایک کروڑ 30 لاکھ ڈالر میں غیر قانونی طور پر خریدا گیا تھا۔

میریک گارلینڈ کا مزید کہنا تھا کہ یہ طیارہ وینزویلا کے صدر نکولس مادورو اور ان کے ساتھیوں کے استعمال کے لیے امریکہ سے باہر اسمگل کیا گیا تھا۔

امریکا نے طیارے کو ضبط کرنے کے لیے ٹریکنگ سائٹ فلائٹ ریڈار 24 کی مدد لی تھی، جس کے مطابق مئی 2023 سے یہ طیارہ وینزویلا کے ایک فوجی اڈے سے خصوصی طور پر پرواز کر رہا تھا۔

ٹریکنگ سائٹ کے مطابق طیارے نے کل صبح سینٹو ڈومنگو سے فورٹ لاؤڈرڈیل کے لیے اُڑان بھری تھی جس کے بعد امریکی حکام نے طیارے کو فورٹ لاؤڈرڈیل ایئرپورٹ سے ضبط کر لیا۔