لندن منتقل ہونے کی افواہوں کے درمیان انوشکا شرما کی بھارت واپسی

 ممبئی: بھارتی کرکٹر ویرات کوہلی کی اہلیہ و بالی ووڈ سُپر اسٹار انوشکا شرما بیٹے کی پیدائش کے بعد پہلی بار بھارت واپس آگئی ہیں۔

انوشکا شرما اپنے بیٹے کی پیدائش سے قبل ہی بھارت سے لندن چلی گئی تھیں، مداحوں کی جانب سے طویل عرصے سے یہ قیاس آرائیاں کی جارہی تھیں کہ انوشکا اور ویرات ممبئی میں میڈیا کی توجہ سے ہٹ کر لندن میں زندگی بسر کررہے ہیں۔

بھارتی میڈیا کی جانب سے یہ خبر بھی سامنے آئی تھی کہ انوشکا شرما اور ویرات کوہلی اپنے دونوں بچوں کے ہمراہ بھارت چھوڑ کر لندن منتقل ہوگئے ہیں تاہم جوڑے کی جانب سے اس خبر پر کوئی ردعمل سامنے آیا تھا۔

لندن منتقل ہونے کی افواہوں کے درمیان ہی انوشکا شرما واپس بھارت آگئی ہیں، اداکارہ کو ممبئی ایئرپورٹ پر دیکھا گیا جس کی ویڈیو بھی سوشل میڈیا پر وائرل ہوئی ہے۔

مزید پڑھیں: انوشکا شرما بیٹے کی پیدائش کے بعد پہلی بار کیمرے کے سامنے کب آئیں گی؟

بھارتی میڈیا کے مطابق اداکارہ کو 4 ستمبر یعنی آج صبح ممبئی ایئرپورٹ پر اپنے بچوں کے بغیر دیکھا گیا، انوشکا شرما بیٹے کی پیدائش کے بعد پہلی بار عوامی سطح پر میڈیا کے سامنے آئی ہیں۔

انوشکا شرما کی بھارت واپسی پر مداح خوش ہوگئے ہیں، مداحوں کی جانب سے اندازے لگائے جارہے ہیں کہ اداکارہ کام کے سلسلے میں ممبئی آئی ہیں۔

View this post on Instagram

A post shared by Snehkumar Zala (@snehzala)

واضح رہے کہ انوشکا شرما اور ویرات کوہلی کے ہاں رواں سال 15 فروری کو بیٹے کی پیدائش ہوئی تھی لیکن اس جوڑی نے 20 فروری کو سوشل میڈیا کے ذریعے اپنے بیٹے کی پیدائش کا اعلان کیا تھا۔

اس سے قبل اسٹار جوڑی کے ہاں جنوری 2021 میں پہلی بیٹی کی پیدائش ہوئی تھی جس کا نام اُنہوں نے وامیکا رکھا تھا۔