بابر اعظم آئی سی سی ٹیسٹ رینکنگ میں ٹاپ 10 سے بھی باہر ہوگئے

 دبئی: انٹرنیشنل کرکٹ کونسل (آئی سی سی) کی جانب سے جاری ہونے والی نئی ٹیسٹ رینکنگ میں بابر اعظم مزید تنزلی کے ساتھ چار سال بعد بلے بازوں کی فہرست میں ٹاپ 10 سے بھی باہر ہوگئے۔

بنگلادیش کے خلاف دو ٹیسٹ میچز کی سیریز میں خاطر خواہ کارکردگی نہ دکھانے والے بابر اعظم کی پوزیشن مزید کمزور ہوگئی ہے، آئی سی سی کی جانب سے جاری ہونے والی ٹیسٹ رینکنگ کے مطابق بابر اعظم ناقص کارکردگی کے باعث اب 712 پوائنٹس کے ساتھ 12ویں نمبر پر پہنچ گئے ہیں۔

بابر اعظم نے بنگلادیش کے خلاف ہونے والی ٹیسٹ سیریز کی چار اننگز میں مجموعی طور پر 64 رنز بنائے جبکہ وہ دسمبر 2022 کے بعد سے ٹیسٹ کرکٹ میں نصف سنچری اسکور نہیں کرسکے ہیں۔

آئی سی سی کی رینکنگ میں قومی ٹیم کے وکٹ کیپر محمد رضوان دسویں نمبر پر ہیں جبکہ بھارت کے روہت شرما، جیس وال اور ویرات کوہلی کی بدستور 6، ساتویں اور آٹھویں پوزیشن برقرار ہے۔

ٹیسٹ رینکنگ میں شامل پہلے پانچ کھلاڑی

ٹیسٹ رینکنگ میں انگلینڈ کے جوئے روٹ کی بادشاہت برقرار ہے جبکہ دوسرا نمبر نیوزی لینڈ کے کین ولیمسن کا ہے اس کے علاوہ نیوزی لینڈ کے ڈیری مچل تیسرے، چوتھا آسٹریلیا کے اسٹیون اسمتھ اور انگلینڈ کے ہیری بروک پانچویں نمبر پر رہے۔

اُدھر ٹیسٹ بولرز کی رینکنگ میں کوئی پاکستانی بولر شامل نہیں ہے اور شاہین شاہ آفریدی مزید تنزلی کے بعد اب گیارہویں نمبر پر پہنچ گئے ہیں۔

آئی سی سی کے پوائنٹس ٹیبل کے مطابق بنگلادیش سے سیریز میں تاریخی ناکامی پر پاکستان کی ٹیم چھٹے سے آٹھویں نمبر پر چلی گئی ہے۔