شان مسعود کا ٹیسٹ کپتانی چھوڑنے سے انکار

  کراچی: شان مسعود نے ٹیسٹ کپتانی چھوڑنے سے انکار کردیا، انھوں نے کہا کہ میں استعفیٰ نہیں دے رہا، سوشل میڈیا پر بات کا بتنگڑ بن جاتا ہے، شاہین آفریدی کے ساتھ اختلافات اور جیسن گلیسپی سے الجھنے کی باتوں میں کوئی سچائی نہیں ہے، میچ کے دوران ہم سوشل میڈیا سے دور رہنے کی کوشش کرتے ہیں۔

تفصیلات کے مطابق شان مسعود کی قیادت میں پاکستان ٹیم کو ٹیسٹ کرکٹ میں بحرانی صورتحال کا سامنا ہے، اب تک انھوں نے 5 میچز میں کپتانی کی اور تمام میں ہی شکست کا سامنا کرنا پڑا، آسٹریلیا میں 3 میچز کی سیریز میں وائٹ واش ہوا اور اب اپنے ملک میں بنگلہ دیش کے خلاف 2 میچز کی سیریز میں کلین سوئپ کی خفت سے دوچار ہونا پڑا۔

مزید پڑھیں: بنگلادیش سے ٹیسٹ میں وائٹ واش، شان مسعود نے قوم سے معافی مانگ لی

بطور کپتان اس مایوس کن کارکردگی کے بعد ان کے قیادت سے مستعفی ہونے کی سوشل میڈیا پر افواہیں بھی پھیلیں، اس حوالے سے جب شان سے پوچھا گیا تو انھوں نے دوٹوک انداز میں کہا کہ میں کپتانی سے مستعفی نہیں ہورہا،انھوں نے ایک وائرل ویڈیو کی بھی وضاحت کی جس میں شاہین آفریدی اپنے کندھے پر سے ان کا ہاتھ ہٹا رہے ہیں، اس بارے میں کپتان نے کہا کہ میں نے شاہین کے اس کندھے پر ہاتھ رکھ دیا جس پر گیند لگنے کی وجہ سے انھیں درد ہورہا تھا، اسی لیے انھوں نے میرا ہاتھ وہاں سے ہٹایا، میرے فاسٹ بولر کے ساتھ کوئی اختلافات نہیں ہیں۔

مزید پڑھیں: انگلینڈ کیخلاف سیریز سے قبل کھلاڑیوں کے ساتھ کوئی نرمی نہ برتنے کا فیصلہ

اسی طرح ہیڈ کوچ جیسن گلیسپی کے ساتھ تلخ کلامی کی باتیں بھی سامنے آئیں مگر اس کی حقیقت یہ ہے کہ لٹن داس نے چھکے پر گیند کو باہر پھینک دیا تھا، وہ بمشکل چند اوورز ہی پرانی گیند تھی، اس کی جگہ ہمیں جو گیند دی گئی وہ کافی نرم تھی، ہمارا کہنا یہ تھا کہ اسی نئی سے ملتی جلتی گیند ملنی چاہیے، میں یہی بات گلیسپی سے کررہا تھا۔ شان مسعود نے مزید کہا کہ اسی لیے ہم کوشش کرتے ہیں کہ میچ کے دوران سوشل میڈیا سے دور رہیں۔