وزیراعظم کی فری لانسرز کی ترقی کیلیے گوگل سے منصوبہ پیش کرنے کی خواہش

  اسلام آباد: وزیراعظم شہباز شریف نے معروف ٹیکنالوجی کمپنی گوگل سے فری لانسرز اور چھوٹی صنعتوں کی ترقی کیلیے منصوبہ پیش کرنے کی خواہش کا اظہار کرتے ہوئے کہا ہے کہ ہمیں پاکستان کے روشن مستقبل کیلیے ہمیں زراعت اور معدنیات کے بجائے چھوٹی صنعتوں اور فری لانسرز کو خدمات فراہم کرنا ہوں گی۔

اسلام آباد میں منعقدہ ا ے گوگل فار پاکستان آگے بڑھو کے نام سے تقریب میں اظہار خیال کرتے ہوئے وزیر اعظم نے معروف ٹیکنالوجی کمپنی کو پیش کش کی کہ وہ فری لانسنگ اور ایس ایم ایز کے حوالے سے اپنے آئیڈیاز پیش کریں تو ہم ایسے اقدامات کو نہ صرف خوش آمدید کہیں گے بلکہ ان پر کام بھی کریں گے۔

انہوں نے کہا کہ گوگل کی پاکستان سمیت دنیا بھر میں خدمات لائق تحسین ہیں، یقینا اس کامیابی تک پہنچنے میں ایک لمبا صرف طے کرنا پڑا ہوگا، حقیقت یہ ہے کہ  صبر اور استقامت سے ہی کامیابی ملتی ہے۔ وزیراعظم نے کہا کہ نوجوانوں کی تعلیم و تربیت اور انہیں بااختیار بنانے کیلیے وسائل فراہم کرنا ہوں گے۔

انہوں نے کہا کہ ہمیں ملک میں چھوٹی صنعتوں اور فری لانسنگ کی ترقی کیلیے فریم ورک تیار کرنا ہوگا تاکہ نوجوان برسر روزگار ہوں اور اچھی آمدن حاصل کرسکیں، اگر گوگل اس حوالے سے کوئی منصوبہ لے کر آتا ہے تو ہم اُسے خوش آمدید کہیں گے۔

وزیراعظم نے مزید کہا کہ ہم پاکستان کے روشن مستقبل کیلیے آپ کے ساتھ بیٹھ کر منصوبے پر بات کرنے کیلیے تیار ہیں۔