چیمپئینز ٹرافی انتظامات کا جائزہ لینے آئی سی سی وفد آئندہ ہفتے پاکستان آئے گا

 لاہور: آئی سی سی چیمپئنز ٹرافی کے انتظامات کا جائزہ لینے آئی سی سی کا پانچ سے 6 رکنی وفد آئندہ ہفتے پاکستان کا دورہ کرے گا۔

ذرائع کے مطابق وفد چیمپئنز ٹرافی کے لیے مجوزہ وینیوز کا معائنہ کرے گا۔ ٹیموں کے پریکٹس میچز، ٹکٹنگ سمیت دوسرے اہم ایشوز پر وفد پی سی بی حکام سے ملاقاتیں کرے گا۔ وفد ارکان میں مختلف شعبوں کے سربراہان اور نمائندے شامل ہوں گے۔

وفد کی پاکستان آمد اور مصروفیات کا شیڈول دو سے تین روز میں طے ہوجائے گا، اس سے قبل آئی سی سی کے پچ کنسلٹنٹ، سکیورٹی ہیڈ اور ایونٹس کے لوگ تین دورے کر چکے ہیں۔

لاہور اور کراچی کے اسٹیڈیمز کی اپ گریڈیشن پاکستان کرکٹ بورڈ کے لیے اہم چیلنج ہے، پی سی بی سربراہ محسن نقوی نے دونوں اسٹیڈیمز میں تعمیراتی کاموں کی تکمیل کے لیے 31 دسمبر کی ڈیڈ لائن رکھی ہے۔

پنڈی اسٹیڈیم میں کوئی ایسا بڑا کام نہیں ہوگا جس سے کوئی ایشو ہو۔ لاہور اور کراچی کے اسٹیڈیمز کی بروقت تکمیل پر آئی سی سی حکام کو قائل کرنا بھی بورڈ حکام کے لیے بڑا ٹاسک خیال کیا جارہا ہے۔