پتنگ سازوں کے خلاف کارروائیاں جاری، آن لائن آرڈر پر پتنگیں بیچنے والا ملزم گرفتار

 لاہور: ایس پی سول لائنز ڈاکٹر عبدالحنان کی ہدایت پر پتنگ سازوں کے خلاف کاروائیاں جاری  ہیں گجر پورہ پولیس نے کارروائی کرتے ہوئے آن لائن آرڈر پر پتنگیں بیچنے والا ملزم گرفتار کر لیا۔

ترجمان پولیس کے مطابق ملزم پابندی کے باوجود پتنگیں تیار کر کے فروخت کر رہا تھا جس کے قبضہ سے 300 سے زائد پتنگیں ، خام مال اور چرخیاں برآمد کی گئیں۔

پولیس کا کہنا تھا کہ ملزم لاہور سمیت دیگر اضلاع میں پتنگیں تیار کر کے فروخت کرتا تھا جس کو گجر پورہ کی پولیس نے کارروائی کرتے ہوئے گرفتار کیا ایس پی سول لائنز ڈاکٹر عبدالحنان نے ایس ایچ او گجر پورہ محمد آصف ادریس اور ان کی ٹیم کو شاباش دی۔

ایس پی سول لائنز ڈاکٹر عبدالحنان  نے کہا کہ پتنگ بازی ایک خونی کھیل ہے انسداد پتنگ فروشی و سازی کے حوالہ سے کڑی نگرانی کی جا رہی ہے۔

ملزم کے خلاف تھانہ گجر پورہ میں مقدمہ درج کر کے مزید تفتیش کے لیے حوالہ انویسٹیگیشن ونگ کر دیا گیا۔