پاک فوج سے اظہار یکجہتی کیلئے نوجوان کا دیپالپور سے راولپنڈی پیدل سفر

 لاہور: پاک فوج سے اظہار یکجہتی کے لیے دیپالپور کے نوجوان کا راولپنڈی کی طرف پیدل سفر جاری ہے۔

ایکسپریس نیوز کے مطابق افواج پاکستان سے یکجہتی اور اظہار محبت کے لیے ایل ایل بی تھرڈ ائیر کے طالب علم حافظ ارشاد نے 6 ستمبر کو دیپالپور سے اپنے سفر کا آغاز کیا تھا، حافظ ارشاد پیر کے روز لاہور پہنچے جہاں چند گھنٹے قیام کے بعد دوبارہ اپنی منزل کی طرف چل پڑے، وہ رات مرید کے میں گزارنے کے بعد منگل کی صبح اپنی اگلی منزل کی طرف روانہ ہوں گے۔

حافظ ارشاد نے بتایا کہ وہ ممکنہ طور پر 18 ستمبر کو راولپنڈی پہنچیں گے، وہ روزانہ تقریباً 50 کلومیٹر سفر کررہے ہیں، پیدل سفر شروع کرنے سے قبل انہوں نے دیپالپور سے اوکاڑہ، لاہور اور راولپنڈی تک براستہ جی ٹی روڈ تمام روٹ کا جائزہ لیا اور طے کیا کہ وہ رات کن مقامات پرقیام کریں گے۔

انہوں نے بتایا کہ کھانے کا کوئی سامان ساتھ لیکر نہیں چلے، صرف پانی کی بوتل ساتھ ہے، وہ جہاں پہنچتے ہیں لوگ ان کا والہانہ استقبال کررہے ہیں۔ خواہش ہے کہ راولپنڈی پہنچنے کے بعد ان کی آرمی چیف سے ملاقات ہوجائے، پاکستانی نوجوانوں کی طرف سے اظہار یکجہتی کا پیغام آرمی چیف تک پہنچاؤں گا۔

واضح رہے کہ اس سے قبل اوکاڑہ کا ایک نوجوان عثمان ارشد اوکاڑہ سے خنجراب اور اوکاڑہ سے مکہ مکرمہ تک حج کی سعادت حاصل کرنے کےلیے پیدل سفر کرچکا ہے۔