کراچی ایئرپورٹ پر رواں سال جعلی دستاویزات پر 83 ملزمان گرفتار ہوئے، ایف آئی اے

کراچی ایئرپورٹ پر رواں سال کے دوران ایف آئی اے نے 83 ملزمان کو جعلی دستاویزات کی بنیاد پر گرفتار کیا ہے۔

ایف آئی اے امیگریشن کراچی ایئرپورٹ کی کارکردگی رپورٹ جاری کر دی گئی جس کے مطابق 55 ملزمان کو جعلی ویزوں جبکہ 28 ملزمان کو جعلی پاسپورٹس کی بنیاد پر گرفتار کیا گیا۔

ترجمان ایف آئی اے کے مطابق گزشتہ 8 ماہ کے دوران 16ہزار700 پروازیں کے ذریعے 2.79 ملین مسافروں کی امیگریشن کا عمل مکمل کیا گیا، مختلف اداروں کو سنگین جرائم میں مطلوب متعدد ملزمان کو اسٹاپ لسٹ کی بنیاد پر گرفتار کیا گیا۔

علاوہ ازیں، کراچی ایئرپورٹ پر جدت اور بہتری کا سلسلہ جاری ہے۔ جدید ٹیکنالوجی کو بروئے کار لاتے ہوئے آمد اور روانگی کے کاؤنٹرز کو انٹرپول کے ڈیٹا بیس تک براہ راست رسائی فراہم کی گئی ہے۔

رواں سال آئی سی ایم پی ڈی کے تعاون سے جدید فرانزک اور آئی ٹی آلات سے لیس سیکنڈ لائن آفس کا اجراء کیا گیا۔ سکینڈ لائن آفس کی بدولت ویزا اور پاسپورٹ کی جانچ پڑتال میں مدد ملے گی، امیگریشن افسران کو سفری دستاویزات کی جانچ پڑتال کرنے کے حوالے سے خصوصی ٹریننگز کا انعقاد بھی کیا گیا۔

رئیل ٹائم میں مسافروں کی رائے جاننے اور تجربات شیئر کرنے کے لیے کیو آر کوڈ سسٹم متعارف کرایا گیا ہے جبکہ اس کے ساتھ ساتھ نیا ویزا نظام بھی کامیابی سے نافذ کیا گیا ہے۔ مسافروں کی رہنمائی کے لیے امیگریشن فیسیلیٹیشن افسران کو خصوصی طور پر تعینات کیا گیا۔

ڈائریکٹر کراچی زون نے ایف آئی اے امیگریشن کراچی ایئرپورٹ کی کارکردگی کو سراہتے ہوئے کہا کہ مسافروں کو بہترین امیگریشن سروس کی فراہمی کو یقینی بنایا جائے، سکینڈ لائن آفس انسانی اسمگلنگ کی روک تھام کے لیے مؤثر ثابت ہو رہے ہیں۔ ویزا فراڈ میں ملوث عناصر کے خلاف آہنی ہاتھوں سے نمٹا جائے گا۔

ڈائریکٹر نے ہدایت کی کہ شہریوں سے گزارش کی جاتی ہے کہ اپنی ذاتی دستاویزات کسی کے حوالے نہ کریں، ویزا حصول کے لیے ہمیشہ متعلقہ ملک کی ایمبیسی سے رابطہ کریں۔