18 برس تک پڑوسی کا بِل بھرنے والا امریکی شہری

کیلیفورنیا: امریکا میں ایک شخص پر انکشاف ہوا ہے کہ وہ گزشتہ 18 برس سے انجانے میں اپنے پڑوسی کا بجلی کا بل بھر رہا ہے۔

غیر ملکی خبر رساں ادارے کے مطابق 2006 سے موجودہ اپارٹمنٹ میں رہنے والے کین ولسن کا کہنا تھا کہ انہوں حال ہی میں غور کیا کہ ان کا پیسیفک گیس اور الیکٹر (پی جی اینڈ ای) بِل بڑھ رہا ہے لہٰذا انہوں نے توانائی کے استعمال کو کم کرنے کے لیے اقدامات کیے۔

اس کے باوجود جب ان کا بل کم نہیں ہو پایا تو وہ پی جی اینڈ ای کے دفتر پہنچے۔

ان کا کہنا تھا کہ ان کا خیال تھا کہ یا تو لائن لیک تھی یا کوئی ان کی بجلی چوری کر رہا تھا یا پھر میٹر میں کچھ مسئلہ تھا کیوں کہ کچھ تو ایسا تھا جو ٹھیک نہیں تھا۔

یوٹیلیٹی کمپنی کے ملازمین کین ولسن کے گھر معائنے کے لیے آئے اور تب یہ بات سامنے آئی کہ کمپنی ان سے ان کے بجائے ان کے پڑوس کی بجلی کا بِل وصول کر رہی ہے۔

کین ولسن کا کہنا تھا کہ یہ مغالطہ ممکنہ طور پر گزشتہ 18 برس سے ہو رہا ہو جب سے وہ اس اپارٹمنٹ میں رہ رہے ہیں۔

ادارے نے ایک بیان میں کہا کہ ادارہ اپنی غلطی کو قبول کرتا ہے اور غلطی کی تلافی کا عزم رکھتا ہے۔