بڑے پردے پر واپسی زرین خان نے ایکشن یا کامیڈی فلم کا اشارہ دے دیا
اداکارہ کافی عرصے سے بڑے پردے سے غائب ہیں جس کی وجہ سے مداح ان کی واپسی کا انتظار کر رہے ہیں
بالی ووڈ اداکارہ زرین خان کافی عرصے سے بڑے پردے سے غائب تھیں، جس کی وجہ سے ان کے مداح ان کی واپسی کا بے صبری سے انتظار کر رہے تھے۔
اداکارہ نے حال ہی میں اپنے سوشل میڈیا پر سیشن منعقد کیا، جہاں ایک صارف نے ان سے پوچھا، 'آپ کو مزید فلمیں کرنی چاہئیں، ہم انتظار کر رہے ہیں۔'
اس کے جواب میں زرین نے لکھا، 'ہاں، وقفہ کچھ طویل ہو گیا تھا۔ امید ہے کہ اگلے سال آپ مجھے فلموں میں ضرور دیکھیں گے۔ اگلے سال آپ مجھے اسکرین پر ضرور دیکھ سکیں گے۔'
اس سیشن کے دوران زرین نے یہ بھی انکشاف کیا کہ وہ کن اقسام کی فلموں میں کام کرنا چاہتی ہیں۔ جب ایک صارف نے ان سے پوچھا کہ وہ کس طرح کی فلموں میں کام کرنا پسند کریں گی، تو زرین نے کہا، 'مجھے لگتا ہے کہ میں کوئی مکمل مزاحیہ یا ایکشن فلم کرنا چاہوں گی۔'
اس بات سے ظاہر ہوتا ہے کہ زرین کی اگلی فلم یا تو کامیڈی ہوگی یا پھر ایک ایکشن فلم، جس سے تھیٹر میں ان کی واپسی شائقین کے لیے ایک شاندار تجربہ ثابت ہوگی۔