سوات:
سوات میں منشیات فروشوں کی فائرنگ سے ایس ایچ او تھانہ منگلور شہید ہو گئے جبکہ ایک اہلکار شدید زخمی ہو گیا۔
تفصیلات کے مطابق سوات کے تھانہ مینگورہ کے حدود پیپلز چوک اباسین مارکیٹ میں پولیس ٹیم پر منشیات فروشوں کی جانب سے فائرنگ کی گئی، جس کے نتیجے میں ایچ او تھانہ منگلور انسپکٹر رحیم خان شہید ہو گئے، جبکہ ہیڈ کانسٹیبل عطاء اللہ شاہ شدید زخمی ہوئے۔
زخمی اہلکار کو فوری طور پر سیدو شریف ہسپتال منتقل کر دیا گیا، جہاں ان کی حالت تشویشناک بتائی جا رہی ہے۔
پولیس کی جوابی فائرنگ کے دوران ایک منشیات فروش ہلاک ہو گیا، جبکہ دوسرا جائے وقوعہ سے فرار ہونے میں کامیاب ہو گیا۔
پولیس نے علاقے میں سرچ آپریشن شروع کر دیا ہے تاکہ فرار ہونے والے ملزم کو گرفتار کیا جا سکے۔
ہلاک ہونے والے منشیات فروش کی شناخت شریف سکنہ بنجوٹ منگلور کے طور پر ہوئی ہے۔ وہ منشیات فروشی میں ملوث تھا اور پولیس کو اس کی تلاش تھی۔