لاہور:
اپوزیشن کے 26 ارکان کے خلاف ریفرنس بھیجنے کا معاملے پر اسپیکر پنجاب اسمبلی اور اپوزیشن کے درمیان مذاکرات جاری رکھنے پر اتفاق کیا گیا ہے۔
اسپیکر اور اپوزیشن نے اگلی نشست اتوار کے روز کرنے کا فیصلہ کیا ہے۔ پارلیمانی لیڈرز کی میٹنگز اتوار کے روز پنجاب اسمبلی میں ہوگی، جس کی صدارت اسپیکر پنجاب اسمبلی ملک محمد احمد خان کریں گے۔
ملاقات میں حکومت اور اپوزیشن نے اپنا اپنا موقف واضح کیا۔ ملاقات ایک گھنٹے سے زائد جاری رہی اور مختلف امور زیر غور آئے۔
ملاقات میں حکومتی ارکان کی جانب سے دی گئی درخواستوں پر سماعت ہوئی، دوران سماعت حکومت اور اپوزیشن کی جانب سے مذاکرات کرنے کی تجویز دی گئی۔ اسپیکر ملک محمد احمد خان نے مذاکرات کی تجویز کا خیر مقدم کیا۔
صوبائی حکومت اور اپوزیشن کی جانب سے سینیئر اراکین اسمبلی پر مشتمل کمیٹی تشکیل دینے پر اتفاق کیا گیا۔ اسپیکر ملک محمد احمد خان نے مذاکرات کے عمل کو پسندیدہ پارلیمانی عمل کے طور پر سراہا۔
اپوزیشن کے معطل ارکان کی قیادت اپوزیشن لیڈر ملک احمد خان بھچر نے کی۔ اسپیکر کی معاونت کے لیے پارلیمانی امور کے وزیر مجتبیٰ شجاع الرحمٰن، چیف وہپ رانا محمد ارشد سمیت دیگر اہم رہنما موجود تھے۔
ذرائع کے مطابق اپوزیشن اراکین نے مفاہمت کا راستہ اختیار کرنے فیصلہ کیا ہے۔
اپوزیشن مشاورت
اسپیکر پنجاب اسمبلی سے ملاقات سے قبل اپوزیشن چیمبر میں معطل ارکان اسمبلی کی مشاورت ہوئی۔ اپوزیشن لیڈر ملک احمد خان بچھر کی زیر صدارت ہونے والی مشاورت میں معطل ارکان اسمبلی نے تمام آپشنز پر غور کیا۔
اپوزیشن اراکین نے اپوزیشن لیڈر سے مشاورت میں گفتگو کرتے ہوئے کہا تھا کہ اسمبلی سے باہر رہ کر عوام اور جماعت کے لیے کچھ نہیں کر سکتے۔
اپوزیشن لیڈر سے مشاورت میں 105 اپوزیشن اراکین میں سے 60 اراکین نے اسمبلیوں
میں بیٹھنے کے لائحہ عمل کو ترجیح دی۔
مشاورت میں تین شرائط بھی طے کی گئی تھیں جو اسپیکر کے سامنے رکھی گئیں۔ ان شرائط میں معطل اراکین پر 20 لاکھ روپے جرمانہ ختم کرانا سرفہرست تھا۔
واضح رہے کہ اسپیکر پنجاب اسمبلی کی جانب سے نااہلی کا ریفرنس موصول ہونے کے بعد معطل ارکان کو ذاتی شنوائی کا موقع دیا گیا تھا۔
