القاعدہ کے سربراہ ایمن الظواہری کا بھارت میں تنظیمی شاخ قائم کرنے کا اعلان

واشنگٹن: القاعدہ کے سربراہ ایمن الظواہری نے بھارت میں اپنی تنظیم کی شاخ قائم کرنے کا اعلان کیا ہے جب کہ اس ویڈیو کے اجرا کے بعد بھارت نے سیکورٹی الرٹ جاری کردیا ہے۔ 

غیرملکی خبر رساں ادارے کے مطابق انٹر نیٹ پر جاری کی جانے والی ایک وڈیو میں ایمن الظواہری نے عربی اور اردو زبان کے ذریعے اپنا پیغام پہنچایا ہے۔ 55 منٹ دورانیئے کی اس وڈیو میں ایمن الظواہری کا کہنا تھا کہ امتِ مسلمہ اپنی سرزمین کی آزادی، خودمختاری کی بحالی اور خلافت کے دوبارہ قیام کے لئے دشمنوں کے خلاف جہاد کریں۔ برما، بنگلہ دیش، آسام، گجرات، احمد آباد اور کشمیر کے مسلمان ریاستی جبر اور ناانصافی کا شکار ہیں، جن کی مدد کی جائے گی۔ بھارتی برصغیر میں القاعدہ کا قیام برما، بنگلہ دیش اور بھارتی ریاستوں آسام اور گجرات کے علاوہ مقبوضہ کشمیر کے مسلمانوں کے لئے خوشخبری ہے جہاں وہ اب ناانصافیوں اور مظالم سے بچ سکیں گے۔

ایمن الظواہری کا کہنا تھا کہ برصغیر میں القاعدہ کی نئی شاخ وہاں اسلامی حکومت کے قیام اور جہاد کے پرچم کو لے کر آگے بڑھے گی۔ القاعدہ کی بھارتی شاخ سے منسلک افراد مقامی آبادیوں کو ظلم اور جبر کا نشانہ بنانے سے باز رہیں کیونکہ اگر وہ مسلمانوں کی عظمت کی حفاظت کے لئے جہاد کر رہے ہیں تو انہیں قول اور فعل سے ان کی جان، مال اور آبرو کی حفاظت کرنی چاہئے۔ اپنی وڈیو میں  ایمن الظواہری نے افغان طالبان کے سربراہ مولا عمر کے ساتھ وفاداری کی بھی تجدید کی۔

دوسری جانب بھارت نے اس ویڈیو کے اجرا کے بعد سیکورٹی الرٹ جاری کردیا ہے، بھارتی وزیر داخلہ راج ناتھ سنگھ نے خفیہ اداروں کے سینئرافسران سے ملاقات کی اور ویڈیو کے بعد پیدا ہونے والے ممکنہ حالات پر نئے سیکورٹی اقدامات پر غور کیا جب کہ  وزیر داخلہ ان اقدامات پر وزیر اعطم نریندر مودی کو بھی آگاہ کریں گے۔