اربوں روپے ہڑپ کرنے پر سابق حکومت کیخلاف سیکڑوں کیسزکی تحقیقات ہورہی ہے وزیراعلیٰ بلوچستان

بلوچستان میں امن وامان کی مجموعی صورتحال بہتر اورصوبے میں لاپتا افراد کے مسئلے میں بھی کمی آئی ہے،عبدالمالک بلوچ

ویب ڈیسک September 27, 2014

کوئٹہ کی سڑکیں اب پہلے سے زیادہ محفوظ ہیں، ڈاکٹرعبدالمالک بلوچ، فوٹو:فائل

وزیراعلیٰ بلوچستان ڈاکٹر عبدالمالک بلوچ کا کہنا ہےکہ صوبے میں لاپتا افراد کے مسئلے میں کمی آئی ہے جبکہ اب کوئٹہ کی سڑکیں اب پہلے سے زیادہ محفوظ ہیں۔

کراچی میں ایک تقریب سے خطاب کرتے ہوئے وزیراعلیٰ بلوچستان عبدالمالک بلوچ نے کہا کہ بلوچستان میں امن وامان کی مجموعی صورتحال بہتر ہے،صوبے میں لاپتا افراد کے مسئلے میں بھی کمی آئی ہے جہاں 10 افراد لاپتا ہوتے ہیں تو 8 بازیاب ہوجاتے ہیں اور باقی کے لئے کوششیں کرتے ہیں جبکہ کوئٹہ کی سڑکیں اب پہلے سے زیادہ محفوظ ہوگئی ہیں ۔ انہوں نے کہا کہ ملک میں مخصوص ذہنیت نے نفرتوں کے بیج بوئے اور آج پورا پاکستان اس کا شکار ہے جبکہ ماضی میں افغان جنگ کی مخالفت اس لیے کی کہ جس کے ہاتھ میں بندوق ہوگی وہ سب کو ڈکٹیٹ کرے گا۔

ڈاکٹرعبدالمالک بلوچ کا کہنا تھا کہ کرپشن کے ذریعے بلوچستان کے اربوں روپے ہڑپ کیے گئے جس پر سابق حکومت کے خلاف بھی کرپشن کے 300 کیسز کی تحقیقات ہورہی ہیں جبکہ حکومت کے آگے بلوچستان کا مقدمہ پیش کرنے کی کوشش کررہا ہوں لیکن صوبے کی مخلوط حکومت کے درمیان پھنسا ہوں جہاں روز حساب دینا ہوتا ہے۔ ان کا کہنا تھا کہ ماضی میں صوبے اور یہاں کے لوگوں پر کوئی توجہ نہیں دی گئی جس کے باعث آج بلوچستان میں ہزاروں گریجویٹ بیروزگار ہیں۔