پی سی بی اور یونس خان مل بیٹھ کر معاملے کو حل کریں توبہترہوگا شاہد آفریدی

پاکستان ٹیم کے سینئرزکو باعزت طور پررخصت کرنے کا طریقہ کارہونا چاہئے،بوم بوم آفریدی

ویب ڈیسک September 29, 2014

امید ہے کہ سعید اجمل جلد اپنا ایکشن درست کرکے ایکشن میں نظر آئیں گے، شاہد آفریدی فوٹو: فائل

DUBAI: قومی ٹی 20 کرکٹ ٹیم کے کپتان شاہد آفریدی نے کہا ہے کہ پاکستان کرکٹ بورڈ اور یونس خان مل بیٹھ کر معاملے کو حل کریں تو بہتر ہوگا۔

لاہور میں میڈیا سے بات کرتے ہوئے شاہد آفریدی کا کہنا تھا کہ وہ اپنی فٹنس پر بھرپور توجہ دے رہے ہیں، کراچی کی نسبت لاہورمیں ٹریننگ کی زیادہ سہولیات موجود ہیں اس لئے وہ چاہتے ہیں کہ ورلڈ کپ تک زیادہ سے زیادہ قیام لاہورمیں کریں تاکہ بھر پور انداز میں کرکٹ کے میگا ایونٹ میں شرکت کرسکیں۔ انہوں نے کہا کہ قومی ٹی 20 کرکٹ ٹیم کی قیادت ان کے لئے اعزاز ہے اور وہ یہ ذمہ داری بہتراندازمیں نبھانے کی ہر ممکن کوشش کریں گے۔

اسٹار آل راؤنڈر کا کہنا تھا کہ پاکستان ٹیم کے سینئرزکو باعزت طور پررخصت کرنے کا طریقہ کارہونا چاہئے، وہ سمجھتے ہیں کہ اگر پی سی بی اور یونس خان مل بیٹھ کر معاملے کو حل کریں تو بہتر ہوگا۔ ان کا کہنا تھا کہ انہیں امید ہے کہ سعید اجمل جلد اپنا ایکشن درست کرکے ایکشن میں نظر آئیں گے۔