کرسی کسی کی بھی ہو ہم نے جمہوریت کو بچانا ہے آصف زرداری

ہم نے ایسا ماحول پیدا کرنا ہے جس سے آج کی ملالہ اور آنے والی ملالاؤں کوملک میں اچھا ماحول ملے،شریک چیرمین پیپلزپارٹی

ویب ڈیسک October 15, 2014

پاکستان کو اللہ نے بہت کچھ دیا ہے ہمیں صبر کرنا سیکھنا چاہئے،سابق صدر فوٹو:فائل

سابق صدر آصف زرداری کا کہنا ہے کہ ہم نے کرسیوں کی جنگ نہیں کرنی بلکہ کرسی کسی کی بھی ہو ہم نے جمہوریت کو بچانا ہے۔

ایکسپریس نیوز کے مطابق پیپلز پارٹی پنجاب کے صدر منظور وٹو کی جانب سے دیئے گئے عشائیے سے خطاب کرتے ہوئے سابق صدر آصف زرداری نے کہا کہ پیپلز پارٹی نے جو وعدے کئے ان کو پورا کیا، ہم نے نہ صرف فاٹا کے لوگوں کو ان کے حقوق دیئے بلکہ حکومت میں آتے ہی بلوچوں سے بھی معافی مانگی جب کہ ہمارے دور اقتدار میں ٹیکسٹائل کی برآمدات14ارب ڈالرتک پہنچ گئی تھیں۔ ان کا کہنا تھا کہ لوگ پالیسیوں کودیکھ کرپیسہ باہرسے لاتے ہیں نہ کے تقریریں سن کر، ہم نےقوم کے لئےجوبھی کرنا ہےوہ ہمیشہ کے لئے کرناہے، پاکستان کو اللہ نے بہت کچھ دیا ہے ہمیں صبر کرنا سیکھنا چاہئے۔

آصف زرداری نے کہا کہ ہم نے کرسیوں کی جنگ نہیں کرنی بلکہ کرسی کسی کی بھی ہو ہم نے جمہوریت کو بچانا ہے، ہم نے اپنی اگلی نسلوں کو بھی بچانا ہے اور ایسا ماحول پیدا کرنا ہے جس سے آج کی ملالہ اور آنے والی ملالاؤں کو ملک میں اچھا ماحول ملے۔ ان کا کہنا تھا کہ اب بھی ٹی وی چینلزمیں گلوبٹ جیسی سوچ والےلوگ ہیں ، پنجاب سب پاکستانیوں کا ہے اور میرا پنجاب سے پرانا رشتہ ہے کیوں کہ میں نے یہاں 7 سال جیل میں کاٹے ہیں۔