پشاور میں طالب علم کا گورنر خیبر پختونخوا سے ڈگری لینے سے انکار’’گو نوازگو‘‘ کے نعرے

طالبعلم نے وائس چانسلر سے استدعا کی کہ وہ انہیں ڈگری سے نوازیں، انکار پر اس نے گورنر خیبرپختونخوا سے بھی ڈگری نہ لی

ویب ڈیسک October 30, 2014

گورنر خیبر پختونخوا سے گولڈ میڈل نہ لینے والے طالب علم کا تعلق خیبر ایجنسی سے ہے اور اس کا نام اسفندیار ہے۔ فوٹو: ایکسپریس نیوز

یونیورسٹی کے سالانہ کانوکیشن کے دوران ایک طالب علم نے گورنر خیبر پختونخوا سردار مہتاب عباسی سے ڈگری وصول کرنے سے انکار کرتے ہوئے ''گو نواز گو'' کے نعرے لگا دیئے۔

ایکسپریس نیوز کے مطابق پشاور یونیورسٹی میں طلبہ کے سالانہ کانوکیشن کی تقریب منعقد ہوئی جس کے مہمان خصوصی گورنر خیبر پختونخوا سردار مہتاب خان عباسی تھے، تقریب کے دوران خیبرایجنسی سے تعلق رکھنے والے طالبعلم اسفندیار نے اسٹیج پر آکر گورنر خیبر پختونخوا سے ڈگری وصول کرنے سے انکار کرتے ہوئے وائس چانسلر سے استدعا کی کہ وہ انہیں ڈگری سے نوازیں، وائس چانسلر کے انکار پر اسفندیار نے سند وصول کرنے سے ہی انکار کردیا اور ''گو نواز گو'' کے نعرے لگائے۔

واضح رہے کہ سردار مہتاب خان عباسی وزیر اعظم نواز شریف کے انتہائی قریب سمجھے جاتے ہیں اور وہ ماضی میں مسلم لیگ (ن) کی جانب سے صوبے کے وزیر اعلیٰ بھی رہ چکے ہیں۔